Әһли Бејт (әлејһимус сәлам) -АБНА- Хәбәр Аҝентлијинин вердији хәбәрә әсасән, Президент Илһам Әлијев һөкумәтин 2014-ҹү илин јекунларына һәср едилән иҹласында да, 2015-ҹи илин биринҹи, икинҹи, үчүнҹү рүбләринә даир топлантыларында да һәр дәфә “игтисадијјатын уғурлу инкишафы”ндан, еләҹә дә “игтисади артым”дан, “инфлјасыјанын чох ашағы сәвијјәдә олмасы”ндан, “әһалинин пул ҝәлирләринин артмасы”ндан вә 2014-ҹү илдәки кими 2015-ҹи или дә “уғурла баша вураҹағымыздан” гүрурла данышыб вә јени вәдләр вериб.
Анҹаг, тәкҹә 2015-ҹи ил әрзиндә президентин “уғурлу инкишаф” вә ја “инсанларын рифаһ һалынын јахшылашмасы”на даир 3 вәдинин јалан олдуғу үзә чыхды… Башлајаг, елә Илһам Әлијевин сәдрлијилә кечирилән Назирләр Кабинетинин 2014-ҹү илин јекунларына һәср олунан иҹласындан.
Бу иҹласда президент, гејд етдијимиз кими, “игтисади ҝөстәриҹиләримизин чох мүсбәт” олмасындан данышыб вә өз аләминдәки уғурлара алудә олараг даһа да ирәли ҝедиб. Хүсусилә дә Азәрбајҹанда манатын мәзәннәсинин сабит олдуғуну вә бунун бир даһа “уғурлу игтисади сијасәтимизи” ҝөстәрдијини вурғулајыб.
Илһам Әлијев бу ил јанварын 10-да кечирилән һәмин иҹласда лап белә дејиб: “Бу ҝүн манат дүнја мигјасында ән сабит валјуталардан биридир. Һесаб едирәм ки, хариҹи вәтәндашлар вә хариҹи ширкәтләр өз вәсаитини манат һесабларында сахласалар, удузмазлар. Һәм пуллар јериндә галаҹаг, ејни заманда, о пуллар онлара әлавә ҝәлирләр ҝәтирәҹәкдир”.
Һәтта президент дүнјада нефтин гијмәтинин кәскин шәкилдә ашағы дүшмәсинә бахмајараг, дејиб ки, “әминәм, Азәрбајҹан бу вәзијјәтдән дә шәрәфлә чыхаҹаг, манатын мәзәннәси сабит олараг галаҹаг, игтисади инкишаф тәмин едиләҹәкдир”.
Амма бу вәдин үстүндән бир ај сонра, даһа дәгиги, февралын 21-дә манатын биринҹи девалвасијасы баш верди вә манат дәјәрини 34 фаиз итирди…
Президентин бу ил јалан чыхан икинҹи вәди исә әһалидән алынан әмлак верҝиси илә бағлыдыр. Илһам Әлијев һәлә 10 ил өнҹәки мүшавирәдә бүтүн әмлакын базар гијмәтилә дәјәрләндирилиб вә әмлак верҝисинин дә бу дәјәр әсасында һесабланмасынын ваҹиблијини билдирмишди. Анҹаг һәмин “уғурлу инкишаф” илләриндә дөвләт башчысы һуманист давранараг әмлак верҝисинин јалныз бөјүк вә дәјәрли әмлакын саһибләриндән тутулмалы олдуғуну тапшырмышды. Президент о заман дәјәри көһнә манатла 200 милјон, јахуд 100 милјона гәдәр олан әмлакын, үмумијјәтлә, верҝијә ҹәлб едилмәмәсини билдирмишди… Амма бу илдән башлајараг әмлак верҝиси баһалы мүлкләр нәди, һәтта буна гәдәр, үмумијјәтлә, верҝијә ҹәлб едилмәјән садә мәнзилләрә, евләрә дә тәтбиг едилди.
Мараглыдыр ки, Илһам Әлијевин әмлак верҝиси илә бағлы тапшырығынын иҹрасы нә аз, нә чох – дүз 10 ил сонра, мәһз нефтин уҹузлашмасындан сонра јада дүшдү.
Нәһајәт, президентин боша чыхан үчүнҹү вәди!
Илһам Әлијев Назирләр Кабинетинин 2015-ҹи илин доггуз ајынын јекунларына һәср олунан иҹласында билдирмишди ки, дәрманлар уҹузлашдырылыр вә илин сонуна гәдәр әксәр дәрман препаратларынын гијмәти ашағы дүшәҹәк. Буну “чох ҹидди сосиал аддым” кими дәјәрләндирән президентин бу вәдиндән 40 ҝүн өтмәмиш, јәни декабрын 21-дә манатын икинҹи девалвасијасы нәтиҹәсиндә исә әксинә, дәрманларын гијмәти баһалашды. Һәм дә, манат икинҹи дәфә доллара нисбәтдә 50 фаиз уҹузлашдығы һалда, дәрманлар 100 фаизәдәк баһалашды.
Биз президентин тәкҹә бир илдә халгын рифаһы илә бағлы 3 вәдинин јалан чыхдығыны хатырладыг. Бәлкә, унутдуғумуз диҝәр јаланлар да вар, хатырлајанлар бизә јазмағы да унутмасын. Белә бир суалымызы да ҹавабландырмағы унутмајын: бир дөвләт башчысы халга дәфәләрлә јалан вәдләр верирсә, буна ҝөрә һансы мәсулијјәти дашыјыр?
Диггәт: Хәбәрдән истифадә етдикдә мәнбәјә истинад лазымдыр
