Әһли-Бејт (әлејһимус сәлам) – Бејнәлхалг Хәбәр Аҝентлији- АБНА: Гәрби Австралијадан олан 16 јашлы ҝәнҹ мәһкәмәдә Сиднејдәки Мәсҹидә гаршы интернетдә һәдәләјиҹи материал јерләшдирдијини етираф едиб.
Јеткинлик јашына чатмадығы үчүн шәхсијјәти ачыгланмајан јенијетмә ҹүмә ҝүнү Бунбурј Ушаг Мәһкәмәсиндә гыса мүддәтә ҝөрүнәрәк, етираф едиб.
Сөһбәт мартын әввәлиндә Сиднеј әтрафында јерләшән “Әл-Бејт Әл-Ислами” Мәсҹидинин Инстаграм һесабына ҝөндәрилән бир сыра тәһдид месажларындан ҝедир.
Онун јазылары арасында 2019-ҹу илдә Јени Зеландијанын Крајстчөрч шәһәриндә, ики Мәсҹиддә, Ҹүмә Намазы заманы 51 нәфәрин өлдүрүлмәси илә нәтиҹәләнән террор актларына ишарә едилиб. Һәмчинин онун јазыларында үстүнлүкчү вә иргчи шүарлар да мөвҹуд олуб.
Полисин арашдырмасындан сонра јенијетмәнин еви Гәрби Австралијанын ҹәнуб-гәрб бөлҝәсиндә мүәјјән едилиб. Әмәлијјат-ахтарыш тәдбирләри һәјата кечирән әмәкдашларын үзәриндән мобил телефон вә ојун консолу ҝөтүрүлүб. Јенијетмә даһа сонра тәһлүкә вә ја тәһлүкәнин мөвҹудлуғу барәдә јанлыш тәсәввүр јаратмагда иттиһам олунуб.
Мәһкәмә иҹласы заманы полис прокурору Ҹејн Ҝиллһам билдириб ки, Крајстчөрч һүҹумунун ҝөрүнтүләри оғланын телефонунда сахланылыб.
Һаким Стивен Бутчер јенијетмәјә билдириб ки, онун һәрәкәтләри әввәлләр тәһдидләрә мәруз галан ҹәмијјәтдә горхуја сәбәб олуб.
Һаким дејиб: “Бу тип јазыларын, дүшүнҹәләрин ҹәмијјәтимиздә јери јохдур вә мәһкум олунмалыдыр”.
Мәһкәмә јенијетмәни зоракы екстремизмлә мүбаризә үчүн нәзәрдә тутулмуш тәлим програмында иштирак етмәји әмр едиб. Онун ҹәзаландырылмасы илә бағлы јекун гәрар гәбул едилмәздән әввәл програмдакы ирәлиләјишинә бахылаҹаг.
Sizin rəyiniz