Әһли-Бејт (әлејһимус сәлам) – Хәбәр Аҝентлији АБНА-нын вердији мәлумата әсасән, Авропа Иттифагы бу ҝүн Брүсселдә Ермәнистан вә Азәрбајҹанын јүксәк сәвијјәли рәсмиләринин ҝөрүшүнә ев саһиблији едиб.
"Репорт" бу барәдә АИ-нин сајтына истинадән хәбәр верир.
Ҝөрүш һәр ики өлкә арасында бир сыра мәсәләләрин һәлли јолларыны тапмаг истигамәтиндә бирҝә сәјләри инкишаф етдирмәк үчүн тәшкил едилиб.
Хүсусилә, Авропа Иттифагы Шурасынын президенти Шарл Мишел, Азәрбајҹан Республикасынын Президенти Илһам Әлијев вә Ермәнистан Республикасынын Баш назири Никол Пашинјан арасында 2022-ҹи ил апрелин 6-да Брүсселдә кечириләҹәк ҝөрүшә һазырлыгла бағлы мүзакирәләр апарылыб.
Гејд едәк ки, буҝүнкү ҝөрүшдә Азәрбајҹан Президентинин көмәкчиси Һикмәт Һаҹыјев, Ермәнистан Тәһлүкәсизлик Шурасынын катиби Армен Григорјан вә Авропа Иттифагынын Ҹәнуби Гафгаз үзрә хүсуси нүмајәндәси Тоиво Клаар иштирак едиб.
Һикмәт Һаҹыјев вә Армен Григорјан субстантив мүзакирәләр заманы 14 декабр 2021-ҹи илдә Брүсселдә кечирилән һәр ики өлкәнин лидерләринин ҝөрүшү заманы әлдә олунмуш анлашмаларын давамы олараг Азәрбајҹанла Ермәнистан арасында сијаси вә тәһлүкәсизлик вәзијјәти кими мәсәләләрин спектрини нәзәрдән кечирибләр. Белә ки, өлкә лидерләринин нөвбәти һәфтәләрдә јенидән ҝөрүшү барәдә разылыға ҝәлиниб. Апрелин 6-да кечириләҹәк ҝөрүшдә әввәл галдырылан мәсәләләрлә јанашы, сүлһ сазишинин перспективләри илә бағлы мүзакирәләр давам етдириләҹәк.
Хатырладаг ки, 2021-ҹи ил декабрын 14-дә Брүсселдә Азәрбајҹан Республикасынын Президенти Илһам Әлијевин Авропа Иттифагы Шурасынын Президенти Шарл Мишел вә Ермәнистан Республикасынын баш назири Никол Пашинјан илә бирҝә ҝөрүшү кечирилиб. Ҝөрүшдә Азәрбајҹанын ишғалдан азад едилмиш әразиләринин миналардан тәмизләнмәси мәсәләси ҝүндәлијә ҝәтирилиб, Авропа Иттифагынын бу истигамәтдә Азәрбајҹана техники јардым ҝөстәрмәјә һазыр олдуғу билдирилиб. Ермәнистан-Азәрбајҹан дөвләт сәрһәдинин делимитасијасы илә бағлы һәр ики тәрәф мүвәггәти ишчи групун јарадылмасы илә бағлы разылыға ҝәлибләр. Ејни заманда, коммуникасија вә нәглијјат хәтләринин ачылмасы мәсәләси ҝениш мүзакирә олунуб. Ермәнистан тәрәфи өз әразисиндән дәмир јолу хәттинин чәкилмәси илә бағлы үзәринә дүшән өһдәлији тәсдиг едиб. Билдирилиб ки, Ермәнистан тәрәфи дәмир јолунун чәкилишинә тезликлә старт верәҹәкдир. Бурада ҝөмрүк вә сәрһәд нәзарәт мәсәләләринин гаршылыглы принсип әсасында тәмин олунмасы барәдә разылыға ҝәлиниб.
Диггәт: Хәбәрдән Истифадә Етдикдә Мәнбәјә Истинад Лазымдыр!
