АБНА24 Хәбәр Верир, Русијаја Украјна вә Ҝүрҹүстанын һеч вахт НАТО-ја үзв олмајаҹаглары илә бағлы тутарлы зәманәт лазымдыр. Буну Русија хариҹи ишләр назиринин мүавини Серҝеј Рјабков базар ертәси Ҹеневрәдә АБШ нүмајәндәләри илә тәһлүкәсизлик тәминатларына даир ҝөрүшдән сонра журналистләрә билдириб.
Русијалы рәсми дејиб: "Бизим үчүн Украјнанын һеч вахт НАТО үзвү олмамасына әмин олмаг мүтләг ваҹибдир. Истәрдик ки, НАТО-нун 2008-ҹи илдә Бухарест саммитиндә гәбул едилмиш формул Мадриддә кечирилән саммитдә ҝери ҝөтүрүлсүн вә белә бир ҹүмлә јазылсын: Украјна вә Ҝүрҹүстан һеч вахт Шимали Атлантика Алјансынын үзвү олмајаҹаг”.
Рјабков әлавә едиб: “Биз бош сөһбәтләрдән, јарымчыг вәдләрдән, бағлы гапылар архасында апарылан данышыгларда тез-тез баш верән јанлыш шәрһләрдән безмишик, гаршы тәрәфә етимадымыз јохдур. Бизә вәдләр јох, һүгуги әһәмијјәтли тәминатлар лазымдыр. Бу, Русијанын милли тәһлүкәсизлик мәсәләсидир”.
Хатырладаг ки, јанварын 10-да Русија вә Америка Бирләшмиш Штатларынын Ҹеневрәдә сәккиз саат давам едән тәһлүкәсизлик зәманәти илә бағлы данышыглары баша чатыб. Ҝөрүшдә Русија нүмајәндә һејәтинә хариҹи ишләр назиринин мүавини Серҝеј Рјабков вә мүдафиә назиринин мүавини Александр Фомин, Америка тәрәфинә исә дөвләт катибинин мүавини Венди Шерман рәһбәрлик едир.
342/
11 yanvar 2022 - 12:51
Xəbər kodu: 1217782
Русија билдирир ки, Украјна вә Ҝүрҹүстанын НАТО-ја үзв олмајаҹағына даир Москваја зәманәт лазымдыр.
