Әһли Бејт (әлејһимус сәлам) -АБНА- Хәбәр Аҝентлијинин вердији хәбәрә әсасән, Азәрбајҹанлы милјардер Ваһид Әләкбәрова мәхсус “Лукојл” нефт ширкәти Мексикада кечирилән тендерләрә гатылаҹаг.
“ИТАР-ТАСС” аҝентлијин вердији мәлумата ҝөрә, бу барәдә Ваһид Әләкбәров өзү чыхышы заманы билдириб.
“Тендерләрә һазырлашырыг. Мексикада 169 блок инвесторлара тәгдим олунаҹаг”, -дејә Әләкбәров вурғулајыб.
Азәрбајҹанлы милјардер һәмчинин билдириб ки, ширкәтин витсе-президенти Леонид Федун өзүнәмәхсус сәһмләри сатаҹағы тәгдирдә онлары ала биләр:
“Әҝәр Федун “Лукојл”дакы сәһмләри сатса, онда мәнә сатаҹаг”,- дејә Алекбәров вурғулајыб.
Гејд едәк ки, Ваһид Әләкбәров 1 сентјабр 1950-ҹи илдә Бакынын о вахткы Разин гәсәбәсиндә анадан олмушдур. Атасы Јусиф Әләкбәров мүсәлман азәрбајҹанлы, анасы исә рус казак тајфаларындан олан Татјана Фјодровна христиан иди.
Әмәк фәалијјәтинә Мәшәди Әзизбәјов адына Азәрбајҹан Нефт вә Кимја Институтунда (индики Нефт Академијасы) тәһсил алдығы вахт "Каспромнефт" мүәссисәсинин 2 нөмрәли мүһәндис-техноложи хидмәтиндә нефт вә газ һасилаты үзрә оператор кими башлајан һәмјерлимиз, ССРИ нефт вә газ сәнајеси назиринин мүавини, даһа сонра назирин бириниҹи мүавини олуб. 1991-ҹи илин сонунда Перм, Волгоград вә Мажејски заводлары илә Лангенпаснефтгаз, Урајнефтгаз вә Когалымнефтгаз (сонрадан бу үч заводун баш һәрфләри "ЛУКојл" ширкәтинин адына чеврилди) арасында мүгавиләнин имзаланмасына наил олараг, Русијада илк нефт консернини јарадыб. 1993-ҹи илдән индијәдәк Лукојл ширкәтинә президентлик едир. "Шәрәф нишаны" вә Достлуг орденләри, "Гәрби Сибирин дәринликләринин өјрәнилмәси вә нефт-газ комплексинин инкишаф етдирилмәсинә ҝөрә" медалы илә тәлтиф олунуб, игтисад елмләри докторудур. О, дүнјада рәсмән милјардер кими танынан јеҝанә азәрбајҹанлыдыр. 2006-ҹы илдә АБШ-ын "Форбес" журналынын тәртиб етдији дүнјанын ән варлы адамларынын - 793 милјардерин сијаһысында 37-ҹи јери тутуб. Әләкбәровун сәрвәти 11 милјард доллар һәҹминдә гијмәтләндирилир.
Диггәт: Хәбәрдән истифадә етдикдә мәнбәјә истинад лазымдыр
