Әһли Бејт -АБНА- хәбәр аҝентлијинин вердији хәбәрә әсасән Авропада јашајан азәрбајҹанлы мүһаҹирин јаратдығы Бејнәлхалг Һагг вә Әдаләт Ассосиасијасы ијунун 30-да Исвечрәнин пајтахты Берндә Азәрбајҹан сәфирлији өнүндә етираз аксијасы кечириб. Аксијанын мәгсәди Азәрбајҹанда инсан һаггларынын позулмасына вә коррупсијанын мигјасына диггәт ҹәлб етмәк олуб.
Аксијада азәрбајҹанлы мүһаҹирләр фәал иштирак едиб. Онлар әлләриндә Азәрбајҹан бајраглары вә мүхтәлиф шүарлар тутублар.
Аксијанын гәтнамәсиндә дејилир ки, Азәрбајҹанда јаранмыш мөвҹуд сосиал – игтисади вә иҹтимаи – сијаси вәзијјәт бөһран һәддинә чатыб. Стратежи бахымдан тәбии сәрвәтлә зәнҝин олан өлкәдә әһалинин бөјүк бир һиссәси јохсуллуг һәддиндәндән ашағы сәвијјәдә јашајыр. Ышсизлик һәддинин јүксәк олмасы сәбәбиндән бу ҝүн азәрбајҹан инсаны ади формада нормал гидаланмаг имканына малик дејил. Мәһз ишсизлик сәбәбиндән минләрлә Азәрбајҹан ҝәнҹи өлкәни тәрк етмәк мәҹбуријјәтиндә галыб. Хариҹи өлкәләрдә чөрәк газанмаг үчүн мин бир әзијјәт, тәһгир вә тәзјигләрлә үзләшән Азәрбајҹан инсаны чыхыылмаз вәзијјәтә дүшүб. Бунун нәтиҹәсидир ки, бу ҝүн өлкәнин шәһәр, рајон вә кәндләри сүрәтлә бошалыр.
“Һакимијјәт исә, өлкәнин ҝүнү–ҝүндән инкишаф етмәси вә јени иш јерләринин ачылмасы кими јаланчы һесабатлар вермәклә мәшғулдур. Парк вә јералты кечидләрин ачылышы јени иш јерләри вә сосиал–игтисади инкишаф ҝөстәриҹиси дејил. Јаранмыш вәзијјәтин әсас сәбәбләриндән бири һакимијјәтин коррупсијалашмасы вә рүшвәтин ҝөрүнмәмиш дәрәҹәдә инкишафыдыр. Мәһз коррупсија вә рүшвәтин инкишаф темпинә ҝөрә Азәрбајҹан бу ҝүн дүнјада аналогу олмајан өлкәләр сырасындадыр”, - дејә гәтнамәдә гејд олунур.
Сәнәддә даһа сонра Азәрбајҹанда инсан һагларынын ағыр вәзијјәтдә олмасындан бәһс едилир: “Сосиал статусундан вә милли мәнсубијјәтиндән асылы олмајараг Азәрбајҹан вәтәндашы һәр аддымда һүгугларынын тапдаланмасы илә үзләшир. Һәр дәфә президент, парламент вә бәләдијјә сечкиләри тотал сахтакарлыгла кечирилир. Өлкәдә елементар вәтәндаш һүгуг вә азадлыгларына әмәл едилмир. Буна етираз едән инсанлар исә полис зоракылығына мәруз галыр. Вәзијјәт о һәддә чатыб ки, өлкә вәтәндашы полис тәрәфиндән шәрләнәрәк һәбс едилмәмәси үчүн мүхтәлиф јоллар ахтарыр.
Һәр бир өлкәдә сијаси партијаларын, азад мәтбуат вә вәтәндаш ҹәмијјәти институтларынын вәзијјәти һәмин өлкәдә демократијанын сәвијјәсинин ҝөстәриҹисидир. Бу ҝүн азәрбајҹанда мүхалиф партија нүмајәндәләри мәһз сијаси мөвгејинә ҝөрә һәбс едилир, мүхтәлиф формада тәзјиг вә тәгибләрә мәруз галыр. Мәтбуатын бөјүк бир һиссәси һакимијјәтин монополијасындадыр. Аз сајда олан мүстәгил мәтбуат исә тез-тез ири мәбләғдә малијјә ҹәримәләри илә үзләшир. Мүстәгил журналистләр ја һәбс едилир, ја да мүхтәлиф формада һакимијјәт органлары тәрәфиндән шантажларла үзләширләр”.
Гәтнамәнин сонунда тәшкилатын ирәли сүрдүјү тәләбләр садаланыб.
Диггәт: Хәбәрдән истифадә етдикдә мәнбәјә истинад лазымдыр
