Әһли Бејт -АБНА- хәбәр аҝентлијинин вердији хәбәрә әсасән: Декабрын 12-дә президент Илһам Әлијев Инзибати Хәталар Мәҹәлләсинә дәјишикликләри тәсдигләјиб. Мәҹәлләјә едилмиш дәјишикликлә иҹра һакимијјәти органы илә разылашдырылмадан вәтәндашларын дини тәһсил мүәссисәләриндә тәһсил алмаг үчүн хариҹә ҝөндәрилмәси, дин хадимләринин мүбадиләси, ислам дининә аид ајин вә мәрасимләри Азәрбајҹандан кәнарда дини тәһсил алмыш вәтәндашларын һәјата кечирмәси гадағандыр.
Һәмин ҝүн президент Илһам Әлијев Ҹинајәт Мәҹәлләсинә јениликләри дә имзалајыб. Ҹинајәт Мәҹәлләсинә әлавә едилән јени маддәјә ҝөрә, ганунсуз олараг дини тәјинатлы әдәбијјаты, әшјалары вә дини мәзмунлу башга мәлумат материалларыны истеһсал етмә, идхал етмә, сатма вә ја јајма беш иләдәк мүддәтә азадлыгдан мәһруметмәни нәзәрдә тутур.
Һаҹы Илгар Ибраһимоғлу дејиб ки, јениликләр дини мүһитдә аб-һаванын даһа да ағырлашдырылмасы, инсан һагларынын вә азадлыгларынын даһа да мәһдудлашдырылмасына ҝәтирәҹәк: “Белә ки, ДИни Гурумларла Иш үзрә Дөвләт Комитәсинин бу тәшәббүсү һансыса арашдырмаларын, елми тәдгигатларын, иҹтимаи мүзакирәләрин мәһсулу олмадығы үчүн бунун һансыса расионал тәтбиги дә реал ҝөрүнмүр. Ортада олан одур ки, “тәнзимләмәк” ады алтында дини саһәдә дурумун илдән-илә сәртләшдирилмәсинин шаһидијик.
Сорушан јохдур ки, өнҹәки сәртләшдирмәләрин һансы нәтиҹәләри олду ки, јениләр дә һансыса дәјишиклијә сәбәб олсун?! Јени дәјишикликләр барәдә һарада мүзакирәләр кечирилди, иҹтимаи динләмәләр олунду, һансыса елми әсасландырмалар сәсләндирилди? Бунлардан һеч бири олмады. Белә вәзијјәт нә һүгуга, нә ганунчулуға, нә дә дөвләтчилик мәнтигинә ујғундур”.
Һүгуг мүдафиәчиси ганунлардакы сон јениликләрдә мәнтигсизликләр олдуғуну вурғулајыб: “Дини ајин” нәдир, “хариҹдә дини тәһсил алмаг”, “хариҹдә тәһсил аланын дини ајин јеринә јетирмәси” нә демәкдир? Бу суаллар да ҹавабсыздыр. Динин дөвләтдән ајры олдуғу консепсијаја әсасланан һүгугда әслиндә бунларын ҹавабы ола да билмәз. Садәҹә, мәмурларын ганунлары сәрбәст интерпретасија етмәк имканлары бир гәдәр дә ҝенишләнди.
Диҝәр динләрдән фәргли олараг ислам дининдә дини ајинләри иҹра едәҹәк хүсуси каста јохдур. Мәһз бу сәбәбдән дә јени ганун дәјишикликләринин практики тәтбиги јохдур, садәҹә, мәмурларын һәрәкәт фәзасы ҝенишләнир”.
Дини Етигад вә Виҹдан Азадлыгларыны Мүдафиә Мәркәзинин рәһбәри һесаб едир ки, Инзибати Хәталар Мәҹәлләсинә вә Ҹинајәт Мәҹәлләсинә дәјишикликләр ләғв олунмалыдыр: “Бу, дөвләтчилик јанашмасына ујғун оларды”
Диггәт: Хәбәрдән истифадә етдикдә мәнбәјә истинад лазымдыр
