Әһли Бејт -АБНА- хәбәр аҝентлијинин вердији хәбәрә әсасән: Елчин Кәримбәјли 2011-ҹи ил апрелин 20-дә вәфат едиб. Атанын сөзләринә ҝөрә, оғлу апрелин 2-дә хәстәләниб: “Ајаг бармагларында гангрена башлајыб. Лакин апрелин 20-нә кими ону постдан бурахмајыблар вә һоспитала јерләшдирмәјибләр. Елчинин күрәјиндә, ҝөз наһијәсиндә, әлләриндә вә бәдәнинин диҝәр һиссәләриндә ләкәләр олуб. Бунлар ја дөјүлмә изләри, ја да башга нәсә олуб. Ҝәнҹә һәрби һоспиталында кечирилән експертизанын јекун рәји 20 ҝүндән сонра билинәҹәк”.
Әсҝәрин өлүмүндән сонра Ҝәнҹә Һәрби Прокурорлуғу Ҹинајәт Мәҹәлләсинин 342.2-ҹи маддәси илә (Гуллуға сәһләнкар јанашма) иш галдырыб. “Мән Шәмкир бирләшмәсинин командири ҝенерал-лејтенант Рөвшән Әкбәров вә оғлумун хидмәт етдији һиссәнин командири илә ҝөрүшдүм. Һәр икиси баш верәнләрдән дәрин тәәссүф һисси кечирдикләрини вә чох нараһат олдугларыны билдирдиләр” дејә Әли Кәримбәјли гејд едиб.
Оғлумун хидмәт етдији постда олан әсҝәрләрдән бири билдирди ки, апрелин 20-дә ону дағдан өлү кими - һәмин вахт Елчин комада олуб - дүшүрүбләр. Ону ҝаһ атла апарыблар, ҝаһ дағдан ашағы дијирләдибләр, бир сөзлә, мејитлә давранан кими давраныблар”.
Әсҝәр атасы гејд едиб ки, Елчин Кәримбәјли орду сыраларына 2010-ҹу ил октјабрын 1-дә Нәриманов Рајон Һәрби Комиссарлығындан чағырылыб: “Хидмәт башлајандан үч ај сонра - 2011-ҹи ил јанварын 3-дә Муровдакы постлардан биринә ҝөндәрилиб. Гыш ајларында орада һаванын температуру мәнфи 20-30 дәрәҹәјә енир, нормал шәраит, исти јемәк, һәтта шәхси ҝиҝијенаја әмәл етмәк үчүн шәраит, демәк олар ки, јохдур. Әсҝәрләри чох надир һалларда дәјиширләр, белә ки, һава шәраити имкан вермир. Елчинин өлүмүндән сонра постларда нормал хидмәт үчүн шәраит јаратмаға башлајыблар, диҝәр постлардакы хәстәләри вә ја чохдан дәјишилмәјән әсҝәрләри ашағы дүшүрүбләр. Бәлкә мәним оғлумун өлүмү башгаларына көмәк едәр, даһа ҝәнҹ әсҝәрләр һәлак олмаз”.
Диггәт: Хәбәрдән истифадә етдикдә мәнбәјә истинад лазымдыр
