Әһли Бејт -АБНА- хәбәр аҝентлијинин вердији хәбәрә әсасән: Бу ҝүн әксәр аиләләрин јашадығы проблемләрдән бири дә, сонсузлуг проблемидир. Америка тәдгигатчыларынын арашдырмасы нәтиҹәсиндә мәлум олуб ки, сонсузлуг инфексион хәстәликләрин артмасы вә инсанларын ҝеҹ аилә гурмасы илә әлагәдардыр.
Јени аилә гуран ҹүтлүкләрин 25 фаизинин бу проблемлә гаршылашдығыны дејән һәким-ҝинеколог Рамин Салаһов сонсузлуғун мүхтәлиф сәбәбләрдән јарандығыны билдирир. Дедијинә ҝөрә, сосиал вәзијјәт, стресс вә јан амилләр дә сонсузлуға сәбәб олан амилләрдир. "Әввәлләр гадынлар 18-20 јашларында әрә ҝедирдиләрсә, бу јаш һәдди инди 25-30-а гәдәр галхыб. Сонсузлуг һәр ики фәрддә олан проблемләрдән јарана биләр. Гадынларда јумурталыг, аналыг борусу хәстәликләри, кишиләрдә исә сперма зәифлији нәтиҹәсиндә сонсузлуг баш верир", - дејән һәким сүни мајаланма илә сонсузлуғун минимум һәддә чатдырылдығыны вурғулајыб.
Бәзән сүни мајаланма дедикдә инсанлар елә баша дүшүрләр ки, бу заман јумурта һүҹејрә башга донорлардан ҝөтүрүлүр. Р.Салаһовун сөзләринә ҝөрә исә јумурта һүҹејрә дә, сперма да мүраҹиәт едән ҹүтлүкләрин өзүндән ҝөтүрүлүр. "Биз ханымлара јумуртанын јетишдирилмәси, инкишаф етмәси үчүн хүсуси дәрманлар веририк. Белә ки, нормалда һәр бир ханымда ај әрзиндә 1 јумурта јетиширсә, дәрманлар нәтиҹәсиндә 10-15 бәзән исә даһа чох јумурта әлдә едирик. Сперма илә мајаланан јумурта һүҹејрә 2-3 ҝүн хүсуси ҹиһазларда сахланылыр вә ембирионлар инкишаф едир. Бундан сонра инкишаф етмиш ембрион гадынын ушаглығынын ичәрисинә јерләшдиририк", - дејән һәким 15 ҝүн сонра бу әмәлијјатын нәтиҹәсинин мәлум олдуғуну билдириб. Онун сөзләринә ҝөрә, илкин мәрһәлдә һамиләлијин баш тутмасы дәрәҹәси 40-50 фаиздир.
Һәким дејир ки, сүни мајаланмада илкин мәрһәлә заманы һамиләлијин баш тутмамасы да нормал бир һалдыр. "Биз сүни мајаланма заманы 4-5 ембрион әлдә едирик. Бунун икисини илкин мәрһәлә заманы гадынын ушаглығына јерләшдиририк, галаныны исә сонракы мәрһәләләр үчүн дондуруруг. Илкин мәрһәләдә һамиләлик баш тутурса, 3 ил мүддәтиндә ембрионлар хәстәханада сахланылыр. Бу заман хәстә әлавә хәрҹә дүшмүр. Вә јенидән сүни мајаланма үчүн мүраҹиәт едәндә бу, она чох уҹуз баша ҝәлир".
Һәмсөһбәтимин дедијинә ҝөрә, сүни мајаланмада јаш бөјүк әһәмијјәт кәсб едир: "37 јашдан сонра бүтүн гадынларда јумуртанын кејфијјәти ашағы дүшүр. 40 јашын үстү ханымларда сүни мајаланма заманы чәтинликләр јашанмагла јанашы, һамиләлијин баш тутмасы да мәһдудлашыр. Үмумијјәтлә, јашы 40-дан јухары олан ханымларда һамилә галмаг еһтималы 3 фаиздир".
Ону да дејәк ки, сүни мајаланма әмәлијјаты бунун арзусунда оланлара дәрман хәрҹләрини һесабламасаг, 1500 маната баша ҝәлир.
"Динимиз сүни мајаланманы гәбул едир, амма бахыр шәртләрә", - дејән илаһијјатчы Сәријјә Сами бурада әсас ролу кәбинин ојнадығыны билдирир. "Әҝәр бу әмәлијјаты истәјән ханым вә киши арасында кәбин варса, јәни јумурта һүҹејрә ханымын һәјат јолдашынын спермасы илә бирләшдириләҹәксә, бу заман бу әмәлијјат гәбул олунандыр. Чүнки Ислам аләминдә арада кәбин оларса, ҹүтлүкләр бир-биринә һалал һесаб олунурлар. Амма әмәлијјат әснасында фәрдләрдән биринин сонсузлуғу, хәстәлији мәлум оларса, донорлардан истифадә етмәк һарамдыр. Јәни фәрдләр арасында дини никаһын олмасы мүтләгдир", - дејән илаһијјатчы донорлардан истифадә едилмәсинин динә ујғун олмадығыны вурғулајыб.
Диггәт: Хәбәрдән истифадә етдикдә мәнбәјә истинад лазымдыр
