Әһл Бејт-АБНА-хәбәр аҝентлијинин хәбәринә әсасән Исраилин мүдафиә назири Еһуд Барак Франсаја сәфәрини тәхирә салыб. Буна сәбәб фәләстинли бир групун онун барәсиндә һәбс гәрары чыхармасы вә елан етмәсидир.
Е.Барак “Еуросаторј 2010” силаһ сәрҝисинә гатылмағы планлашдырмышды. Бунунла јанашы, о, Франсанын мүдафиә назири Һерве Морин илә ҝөрүшәҹәкди. Анҹаг "Ассошиејтед Пресс" аҝентлији Фәләстини дәстәкләјән бир груп аксијачынын Баракы сахламаг барәдә иддиа галдырмаларына даир хәбәр јајынҹа, исраилли назир сәфәриндән ваз кечиб. Аксија иштиракчылары Баракы Гәззаја јардым апаран көнүллүләрин гәтлиндә ҝүнаһландырыр.
Түркијә медиасы јазыр ки, 1998-ҹи илдә Чили диктатору Аугусто Пиночетин Инҝилтәрәдә һәбс едилмәсиндән сонра инсанлыға гаршы ҹинајәт ишләдән диктатор вә одиоз назирләр хариҹи сәфәрләрә ҝетмәкдән чәкинирләр. Чүнки һәмин өлкәләрдә онлара гаршы бејнәлхалг мигјаслы мүһакимә иддиалары галдырыла биләр вә онларын һәбси гачылмаз олар.
Гејд едәк ки, Исраилин сабиг хариҹи ишләр назири Тсипи Ливни дә бу үздән Инҝилтәрәјә ҝедә билмир. Орада да ону Гәззада төрәдилән гәтлиамларда иттиһам едирләр. Мәһз бу сәбәбдән Исраил президенти Шимон Перес өтәнилки сечкиләрдән сонра һөкумәтгурма сәлаһијјәтләрини сечки биринҹиси олмуш Ливнијә јох, икинҹи јерә чыхмыш Нетанјаһуја вериб.
