Иран президенти чәршәнбә ҝүнү сәһәр Венесуелаја сәфәри баша чатдыгдан сонра Никарагуа илә әлагәләри инкишаф етдирмәк вә дәринләшдирмәк мәгсәди илә бу өлкәнин пајтахты Манагуаја ҝәлиб.
Сејид Ибраһим Рәиси Никарагуа президенти Даниел Ортеганын онун үчүн тәшкил етдији рәсми гаршыланма мәрасиминдән сонра етдији чыхышында Иран Ислам Ингилабы вә Никарагуа Ингилабынын ејни вахтда гәләбә чалмасы вә бу ики ингилабын гаршылыглы тәсиринә тохунараг, ики өлкәдә империализмлә мүбаризәнин милли гәһрәманларыны еһтирамла јад едиб.
Рәиси мүстәгиллик, азадлыг вә әдаләт истәјини Иран вә Никарагуа халгларынын ингилабларынын ортаг хүсусијјәти адландырыб вә әлавә едиб ки, Иран Никарагуа илә бүтүн саһәләрдә, хүсусилә елм вә технолоҝија саһәсиндә әлагәләри инкишаф етдирмәјә һазырдыр.
Президент гәрблиләрин демократија вә инсан һаглары илә бағлы иддиаларыны јалан адландырараг, дејиб: "Гәрблиләр, хүсусән дә америкалылар инсанларын сәсләриндән јаранан системә һөрмәт етмәлидирләр, лакин онлар бунун әксини едирләр".
Рәиси америкалыларын ИШИД-ин јарадылмасындакы ролуна вә Иран Ислам Республикасынын террорла мүбаризә сијасәтинә ишарә едиб вә дејиб: "Онлар террорла мүбаризә апардыгларыны иддиа едирләр, лакин террорла мүбаризәнин гәһрәманы Һаҹы Гасим Сүлејманини шәһид етдиләр".
Никарагуа президенти Даниел Ортега исә өз нөвбәсиндә Иран вә Никарагуа ингилабларынын ејни вахтда баш вермәсинә тохунараг, дејиб: "Ики өлкәнин ингилаблары һеҝемонларын, хүсусилә дә һәмишә өз ирадәсини башгаларына диктә етмәјә чалышан Американын һөкмранлығына гаршы мүбаризәдә ҝүҹлү көкләрә маликдир".
Никарагуа президенти һеҝемонлуғу империализмин маһијјәтинин бир парчасы кими гијмәтләндирәрәк, әлавә едиб: "Тәкәббүрлүләр инсан һаглары вә демократија бәһанәси илә мүстәгил өлкәләрә тәзјиг едирләр, лакин биз онлара гаршы бүтүн ҝүҹүмүзлә дајанаҹағыг".
О, һәмчинин ики өлкәнин милли гәһрәманларыны јүксәк гијмәтләндириб вә америкалыларын Һаҹы Гасим Сүлејманини шәһид етмәк ҹинајәтини писләјиб вә Иранын террорла мүбаризә гәһрәманынын еһтирамына бир дәгигәлик сүкут елан едиб.
Ортега, чыхышыны "Јашасын Иран, јашасын Гасим Сүлејманинин хатирәси" шүарыны сәсләндирмәклә битириб.
