Иран Ислам Республикасы Хариҹи Ишләр Назирлијинин сөзчүсү Насир Кәнани бәзи Франса рәсмиләринин гејри-конструктив мөвгеләринин тәкрарланмасы вә Иран әлејһинә бәјанатларына ҹаваб олараг бунлары бәјан едиб.
Онун сөзләринә ҝөрә, мүтәшәккил терроризм, зоракылыг вә гәтл кими дәһшәтли әмәлләри илә Гәрби Асијада, о ҹүмләдән Фәләстиндә ҹинајәт төрәдән Исраил режими гынанмаға лајигдир.
Кәнани әлавә едиб: “Франса президенти Иран Ислам Республикасынын сүлһмәрамлы нүвә фәалијјәтләрини тәнгид едәркән, ҝөрүнән одур ки, сионист режимин онларла нүвә башлығына малик олмагла бејнәлхалг ганунлары поздуғуну, ишғалчылыг, һәрби тәҹавүз, реҝионал вә бејнәлхалг тәһлүкәсизлијә тәһдид төрәтмәк рекордуна малик олдуғуну унудуб”.
Хариҹи Ишләр Назирлијинин сөзчүсү сонра дејиб: “Франса тәрәфи Иранын тамамилә Бејнәлхалг Атом Енержиси Аҝентлијинин нәзарәти алтында олан динҹ нүвә фәалијјәтләри илә бағлы сүни нараһатлыг ифадә етмәк әвәзинә, террор дөвләтинин нүвә силаһыны неҹә әлдә етдији барәдә дүнјаја мәлумат вермәлидир”.
Иран Хариҹи Ишләр Назирлијинин сөзчүсү Франса һакимијјәтинә икитәрәфли мүнасибәтләрә даһа чох хәләл ҝәтирмәмәк үчүн мөвҹуд јерсиз јанашманы дүзәлтмәји вә гаршылыглы һөрмәт принсипинә гајытмағы төвсијә едиб.
Гејд едәк ки, Франса президенти Јелисеј сарајында сионист режимин баш назири илә ҝөрүшдән сонра Иранын нүвә програмына гаршы иддиаларыны тәкрарлајыб.
342/
