Гәрб мүттәфигләринин Түркијәдәки вәтәндашларыны мүмкүн һүҹумлар барәдә хәбәрдар етдикдән сонра Түркијә шәнбә ҝүнү вәтәндашларыны АБШ вә Авропада "мүмкүн исламафобија, ксенофобија вә иргчи һүҹумлара" гаршы хәбәрдар едиб.
Түркијә Хариҹи Ишләр Назирлији сәјаһәт едәнләрә ики ајры хәбәрдарлыгда АБШ вә Авропа өлкәләриндәки вәтәндашларына "мүмкүн ксенофобик вә иргчи тәгиб вә һүҹумлар гаршысында сакит давранмағы" вә "нүмајишләрин интенсивләшә биләҹәји әразиләрдән узаг дурмағы" төвсијә едиб.
Хариҹи Ишләр Назирлији билдириб ки, сон вахтлар "анти-Ислам вә иргчи һәрәкәтләр"ин артмасы Авропада дини дөзүмсүзлүјүн вә нифрәтин тәһлүкәли өлчүләрини әкс етдирир вә Авропада иргчи ҹәрәјанлар нараһатлыг доғуран ҝүҹ сәвијјәсинә чатыблар.
Авропада Гуранын јандырылмасы илә бағлы сон инсидентләрдән сонра Анкарадакы бир сыра сәфирликләр, о ҹүмләдән Америка, Алманија, Франса вә Италија сәфирликләри Түркијәдәки вәтәндашларына "мүмкүн гисас һүҹумлары" барәдә хәбәрдарлыг едибләр.
Исвеч Хариҹи Ишләр Назирлији дә Түркијәдәки вәтәндашларындан топланты вә нүмајишләрдән узаг дурмағы төвсијә едиб.
Данимарканын мигрантлара дүшмән мүнасибәт бәсләјән екстремист "сәрт хәтт" партијасынын лидери Расмус Палудан өтән һәфтә Стокһолмдакы Түркијә сәфирлији јахынлығында кечирилән етираз аксијасы заманы Гурани-Кәрими јандырыб вә бу, Түркијә вә Исвеч арасында ҝәрҝинлији даһа да артырыб.
Һолландија вә Данимаркадакы охшар Гуран јандырма һәрәкәтләри дә Анкаранын кәскин гынағына сәбәб олуб.
Түркијә президенти Рәҹәб Тајјиб Әрдоған Авропа өлкәләриндә Гурани-Кәримә гаршы сон һүҹумлары писләјиб вә гејд едиб ки, Гурана һүҹум едән инсанлар јалныз шәхси позғунлугларыны ортаја гојур.
342/
