АБНА24 Хәбәр Верир , апрелин 30-у саат 20:55-дә Ермәнистан силаһлы гүввәләринин бөлмәләри дөвләт сәрһәдинин Басаркечәр рајонунун Јухары Шорҹа јашајыш мәнтәгәсиндә јерләшән мөвгеләриндән Кәлбәҹәр рајонунун Зәјлик јашајыш мәнтәгәсиндә јерләшән Азәрбајҹан Ордусунун мөвгеләрини иричаплы силаһлардан атәшә тутуб.
Азәрбајҹан Мүдафиә Назирлији билдирир ки, бу өлкә бөлмәләри тәрәфиндән адекват ҹаваб тәдбирләри ҝөрүлүб. Шәхси һејәт вә техникада итки јохдур.
"Һазырда гејд олунан истигамәтдә вәзијјәт сабитдир, әмәлијјат шәраити Азәрбајҹан ордусу бөлмәләринин там нәзарәти алтындадыр!", -дејә мәлуматда вурғуланыр.
Гејд едәк ки, бундан әввәл апрелин 6-сы ахшам саатларында Ермәнистан силаһлы гүввәләринин бөлмәләри дөвләт сәрһәдинин Товузгала рајонунун Мүсүрскәнд јашајыш мәнтәгәсиндә јерләшән мөвгеләриндән Азәрбајҹан Ордусунун Товуз рајонунун Ағдам јашајыш мәнтәгәси истигамәтиндә јерләшән мөвгеләрини мүхтәлиф чаплы силаһлардан атәшә тутуб.
Апрелин 3-дә дә Ермәнистан силаһлы гүввәләринин бөлмәләри дөвләт сәрһәдинин Товузгала рајонунун Мүсүрскәнд јашајыш мәнтәгәсиндә јерләшән мөвгеләриндән Азәрбајҹан Ордусунун Товуз рајонунун Ағдам јашајыш мәнтәгәси истигамәтиндә јерләшән мөвгеләрини атәшә тутмушду.
Јерли шәрһчиләр сон ҝүнләр белә һадисәләрин тәсадүфи олмадығыны вә Русијанын тәһрики илә һәјата кечдији гәнаәтиндәдирләр.
Онлар дејирләр ки, белә һадисәләр Азәрбајҹан Республикасы илә Ермәнистан арасында сәрһәдин делимитасијасы илә бағлы Брүссел сазишиндә нәзәрдә тутулмуш тәдбирләрин гаршысынын алынмасы вә сүлһ просесинин һәјата кечирилмәсинә јөнәлмиш мәгсәдјөнлү тәхрибатдыр.
Брүсселдә әлдә олунмуш разылыға әсасән, Ермәнистан-Азәрбајҹан сәрһәдинин делимитасијасы, сәрһәд боју вә она јахын әразидә сабит тәһлүкәсизлик вәзијјәтинин јарадылмасы мәсәләләрини мүзакирә етмәк үчүн Бирҝә Сәрһәд Комиссијасынын јарадылмасы апрелин сонуна тәјин едилмишди.
Тәбии ки, сәрһәддәки сон инсидентләр бунун реаллашаҹағыны шүбһә алтына алыр. Чүнки Москва статус-квонун сахланмасында вә мүнагишәнин үчтәрәфли әсасда сахланмасында мараглыдыр.
Әслиндә, сәрһәддәки тәхрибатлар Ермәнистанын мүнагишә тәрәфи олараг галмасы вә Азәрбајҹан Республикасынын әрази бүтөвлүјүнүн Ирәван тәрәфиндән танынмамасы анламына ҝәлә биләр.
342/
2 may 2022 - 12:01
Xəbər kodu: 1254137
Кәлбәҹәр рајону истигамәтиндә Азәрбајҹан ордусунун мөвгеләри иричаплы силаһлардан атәшә тутулуб.
