Әһли Бејт (әлејһимус-сәлам) - АБНА – Хәбәр Аҝентлији- Динләрин нәзәринә ҝөрә, ахырил-заман о замандыр ки, һејрәтләндиҹи вә бөјүк һадисәләр баш верәҹәкдир. Бу дөвр – дүнја һәјатынын индики сәпкидә давам етмәсинин сону олан дөврдүр ки, ондан сонра јени бир дөвр башлајаҹагдыр. Бу сонракы дөвр бизим јашадығымыз индики дөвр илә фәргли олаҹагдыр. Илаһи динләр бу дөврдә о кәсин зүһуруну хәбәр верирләр ки, Јер үзүндәки зүлмү арадан апараҹаг вә јерини әдаләтлә долдураҹагдыр.
Ислам дининин нәзәринә ҝөрә исә ахырил-заманда зүһур едәҹәк шәхс - Имам Мәһдидир (Аллаһ Таала Онун шәрәфли ҝәлишини тезләшдирсин). Һәр бир интизарда олан мүсәлмана ахырил-заманын әламәтләрини билмәк зәруридир ки, өз тәклифини вә вәзифәләрини мүәјјән едә билсин.
Һәдисләримиздә ахырил-заман үчүн бәзи әламәтләр бәјан едилмишдир ки, онлара ишарә едәк:
1. Ҹәмијјәтдә горху артаҹаг. Имам Багир (әлејһи сәлам) бујурур: “Һәзрәт Гаим (Аллаһ Таала Онун шәрәфли ҝәлишини тезләшдирсин) гијам етмәз, мәҝәр горху илә долу бир дөвранда”. Имам (әлејһи сәалм) башга јердә бујурур: “Мәһди (Аллаһ Таала Онун шәрәфли ҝәлишини тезләшдирсин) о заман гијам едәҹәкдир ки, ҹәмијјәтин рәһбәрлик ишләри залымларын әлиндә олаҹагдыр”.
2. Мәсҹидләрин һидајәтдән бошалмасы. Һәзрәт Пејғәмбәр (сәлләллаһу әлејһи вә алиһ) ахәрил-замандакы мәсҹидләр һаггында бујурур: “Һәмин заманын мәсҹидләри абад вә ҝөзәлдир. Анҹаг һидајәтдән орада хәбәр јохдур”.
3. Инсан һиссләри сојујар. Һәзрәт Пејғәмбәр (сәлләллаһу әлејһи вә алиһ) бујурур: “О рузиҝарда бөјүкләр әлинин алтында оланлара вә кичикләрә рәһм етмирләр, гүввәтли зәифә рәһм етмәз. О заман Аллаһ она (Гаимә (Аллаһ Таала Онун шәрәфли ҝәлишини тезләшдирсин)) зүһур үчүн изн верәр”.
4. Әхлаг фәсадлары артар. Муһәммәд ибни Мүслим нәгл едир ки, Имам Багирә (әлејһи сәалм) дедим: “Еј Аллаһ Рәсулунун (сәлләллаһу әлејһи вә алиһ) оғлу! Сизин Гаим (Аллаһ Таала Онун шәрәфли ҝәлишини тезләшдирсин) нә заман зүһур едәҹәкдир?”. Имам (әлејһи сәлам) бујурду: “О заман ки, кишиләр өзләрини гадынлара вә гадынлар өзләрини кишиләрә бәнзәдәрләр”.
5. Өвлады аз арзу етмәк. Һәзрәт Пејғәмбәр (сәлләллаһу әлејһи вә алиһ) бујурур: “Гијамәт бәрпа олмаз, о замана гәдәр ки, беш өвлад саһиби дөрд өвлад саһиби олмағыны арзу едәр вә о кәсин ки, 4 өвлады олар дејәр: “Еј каш 3 өвладым олајды”. О кәсин ки, 2 өвлады олар, 1 өвлады арзу едәр. О кәсин ки, бир өвлады олар, арзу едәр ки, еј каш өвладым олмајајды”.
6. Ани өлүмләр. Һәзрәт Пејғәмбәр (сәлләллаһу әлејһи вә алиһ) бујурур: “Гијамәт бәрпа олмаз о замана гәдәр ки, ағ өлүм заһир олар”. Сорушурлар ки, ағ өлүм нәдир? Бујурур: “Ани өлүм”.
7. Мүһарибәләр вә гәтлләр. Имам Рза (әлејһи сәлам) бујурур: “Имам Заманын (Аллаһ Таала Онун шәрәфли ҝәлишини тезләшдирсин) зүһурундан әввәл давамлы гәтлләр баш верәҹәкдир”.
Диггәт: Хәбәрдән истифадә етдикдә мәнбәјә истинад лазымдыр