Әһли Бејт (әлејһимус сәлам) -АБНА- Хәбәр Аҝентлијинин вердији хәбәрә әсасән, АБШ вә Авропа Бирлији Иран Ислам Республикасынын нүвә програмы илә бағлы бу өлкәјә гојдуғу санксијалары ҝөтүрдү. Бу барәдә Вјанада ИИР-ла 6-лыг өлкәләринин апардығы јекун мүзакирәдән сонра АБШ вә АБ-нин хариҹи сијасәт идарәләринин рәһбәрләри бәјанат верибләр.
Санксијаларын ҝөтүрүлмәсини тәмин едән Бејнәлхалг Атом Енержиси Аҝентлијинин (МАГАТЕ) өтән илин јајында Иран Ислам Республикасынын нүвә анлашмасына ујғун үзәринә ҝөтүрдүјү өһдәликләри јеринә јетирдијини елан етмәсидир.
МАГАТЕ-нин ачыгламасында ҝөстәрилир ки, Иран Ислам Республикасы нүвә анлашмасынын гүввәјә минмәси үчүн атмалы олдуғу бүтүн гануни аддымлары атыб. Бу артыг јени бир мәрһәлә, бејнәлхалг иҹтимаијјәт үчүн јени бир ҝүндүр.
МАГАТЕ Иран Ислам Республикасынын өз өһдәликләрини јеринә јетирдијинә даир рапортуну БМТ Тәһлүкәсизлик Шурасына да ҝөндәриб.
Өз нөвбәсиндә БМТ, АБШ вә АБ МАГАТЕ-нин рапорту илә нүвә анлашмасында јени сәһифәјә кечилдијини билдирәрәк, Иран Ислам Республикасына гаршы санксијаларын ҝөтүрүлдүјүнү елан едибләр.
АБШ дөвләт катиби Ҹон Керри МАГАТЕ-нин сон мәлуматларыны тәсдигләдикләрини дејиб вә Иран Ислам Республикасына гаршы санксијаны дајандырдыгларыны билдириб.
АБШ-ын ИИР-а гаршы нүвә програмы илә бағлы санксијалары дајандырдығы һаггында мүвафиг сәрәнҹамы да артыг өлкә башчысы Барак Обама имзалајыб. О, һәмчинин өз сәрәнҹамы барәдә Сенат вә Нүмајәндәләр Палатасыны да мәлуматландырыб.
АБ-нин хариҹи ишләр вә тәһлүкәсизлик сијасәти комиссары Федерика Моҝерини дә Бирлијин Иран Ислам Республикасына гаршы нүвә санксијаларыны арадан галдырдығыны елан едиб.
БМТ-нин Вјана офисиндә Америкалы вә иранлы һәмкарлары Керри вә Зәрифлә бирҝә кечирдији мәтбуат конфрансында Моҝерини билдириб ки, Иран Ислам Республикасы үзәринә ҝөтүрдүјү өһдләикләри јеринә јетирдији үчүн она гаршы тәтбиг олунан чохтәрәфли вә бејнәлхалг игтисади вә малијјә санксијалары арадан галдырылыр.
Диггәт: Хәбәрдән истифадә етдикдә мәнбәјә истинад лазымдыр