Әһли Бејт (әлејһимус сәлам) -АБНА- Хәбәр Аҝентлијинин вердији хәбәрә әсасән, Ниҝерија ордусу вә полиси өлкәнин Әһли-Бејт (ә) ардыҹылларынын лидери Шејх Ибраһим Зәкзәкинин тәрәфдарларына Ислам алиминин сағ вә саламат олдуғуна даир зәманәт вериб.
Ниҝеријанын шималында мүсәлман гадынлар Шејх Ибраһим Зәкзәкинин азадлыға бурахылмасы үчүн етираз нүмајиши тәшкил едибләр.
Кадуна вилајәтинин Зарија шәһәриндә топлашан гадынлар Ниҝерија Ислам Һәрәкатынын рәһбәри Шејх Ибраһим Зәкзәкинин фотоларыны әлләриндә галдырараг, "Шејх Зәкзәкини азадлыға бурахын" шүарыны сәсләндирибләр.
Гадынларын сөзчүсү һаҹыханым Аишә Һәсән етиразларла бағлы ачыглама вериб. О, ордунун бомбалар вә мүхтәлиф партлајыҹы маддәләр истифадә етмәклә 27 саат мүддәтиндә мүсәлманлара гаршы гәтлиам етдијини вә миндән артыг мүсәлманы гәтлә јетирдијини билдириб.
"Биз гејд-шәртсиз Шејх Зәкзәки вә ханымынын азадлыға бурахылмасыны истәјирик. Ниҝерија дахилиндә гејри-гануни нәзарәт мәркәзләриндә сахланылан баҹы вә гардашларымызын азадлыға бурахылмасыны тәләб едирик", - дејә һаҹыханым Аишә Һәсән билдириб.
Диггәт: Хәбәрдән истифадә етдикдә мәнбәјә истинад лазымдыр