Әһли Бејт (әлејһимус сәлам) -АБНА- Хәбәр Аҝентлијинин вердији хәбәрә әсасән, Азәрбајҹан Дөвләт Мусигили Театрында халг артисти Лүтфәли Абдуллајевин 100 иллијинә һәср олунан јубилеј тәдбири кечирилиб.
Апанын мәлуматына ҝөрә, тәдбирдә мәдәнијјәт вә туризм назири Әбүлфәс Гарајев, назир мүавини Әдаләт Вәлијев, халг артистләри Ҹаһанҝир Зејналов, Фәрһад Бәдәлбәјли вә башгалары иштирак едибләр.
Әдаләт Вәлијев билдириб: "Мәдәнијјәт вә туризм назиринин ҝөстәриши илә бу илин сентјабрында Шәкидә Лүтфәли Абдуллајевә һәср олунан ҝүлүш ҝүнү кечириләҹәк. Лүтфәли Абдуллајев гыса өмрүнүн бүтүн мәрһәләләриндә һәм кино, һәм дә театр актјору кими Азәрбајҹан мәдәнијјәтинә өз төһфәсини верди. О, өмрү боју өз сәнәтинә бағлы олду, театры севән сәнәткар кими халг тәрәфиндән севилди".
Халг артисти Фәрһад Бәдәлбәјли Л. Абдуллајевлә бағлы хатирәләрини данышыб, актјорун театр вә кино саһәсиндәки хидмәтләриндән данышыб: "Мән она Лүтфәли әми дејирдим. Бизим аиләнин јахын досту, әзизи иди. Инсанлар Лүтфәли әмини она ҝөрә севирләр ки, о да инсанлары севирди".
Халг артистләри Ҹаһаҝир Зејналов, Ариф Гулијев, Александр Шаровски вә башгалары актјорун Азәрбајҹан мәдәнијјәтинин инкишафындакы мүстәсна хидмәтләриндән бәһс едибләр.
Јубилеј тәдбириндә Рус Драм Театрынын, Дөвләт Кукла Театрынын, Дөвләт Ҝәнҹ Тамашачылар Театрынын коллективләри Л. Абдуллајевин сәһнә фәалијјәти илә бағлы мүхтәлиф сәһнәләрлә чыхыш едибләр. Тәдбирдә Л. Абдуллајевин сәһнә фәалијјәтини әкс етдирән видеочарх нүмајиш олунуб.
Гејд едәк ки, Лүтфәли Абдуллајев 1914-ҹү ил мартын 22-дә индики Шәки шәһәриндә анадан олуб.
Орадакы једдииллик мәктәби битириб. Бир нечә ај Шәки Фәһлә Ҝәнҹләр Клубунун драм дәрнәјиндә чалышыб. Клубда кичик мәсхәрәләрдә вә тәрҹүмә олунмуш, тәбдил едилмиш водевилләрдә ојнајыб. 1928-ҹи илин сентјабрында Бакыја ҝәлән Лүтфәли Абдуллајев консерваторијанын валторна синфинин мәшғәләләриндә иштирак етмәјә башлајыб. Вокал сәнәтинә марағы олдуғуна ҝөрә паралел олараг Беролскинин курсунда ифачылыгла мәшғул олуб.
Дәрсләринин ҝедишатыны мүәјјән јөнә салыб системләшдирдикдән сонра јашынын азлығына бахмајараг, мүсабигә илә опера театрынын хор һејәтинә гәбул олунуб.
Тезликлә о, јардымчы актјор кими сөзсүз вә епизод ролларда, гыса вахтдан сонра “Аршын мал алан” опереттасында Вәли ролунда ојнајыб.
1938-ҹи илдә Азәрбајҹан Дөвләт Мусигили Комедија Театры јарананда Лүтфәли Абдуллајев труппаја гәбул едилиб. Театр 1949-ҹу илин јазында малијјә чәтинлији илә бағлы фәалијјәтини дајандырмалы оланда Лүтфәли Абдуллајев Академик Милли Драм Театрына кечиб. Бурада Тулио (“Рәгс мүәллими”, Лопе де Вега), Рәшид (“Кимдир мүгәссир?”, Ҝеорҝи Мдивани), Тағы (“Көһнә дудман”, Әбдүррәһим бәј Һагвердијев), Оддамды (“Од ҝәлини”, Ҹәфәр Ҹаббарлы), Надир (“Чичәкләнән арзулар”, Мәммәдһүсејн Тәһмасиб) ролларында чыхыш едиб. Ики илдән сонра о, Азәрбајҹан Дөвләт Филармонијасынын нәздиндә естрада ансамблы кими чыхыш едән мускомедија труппасында ишләмәјә башлајыб.
1956-ҹы илдә Азәрбајҹан Дөвләт Мусигили Комедија Театрынын Азәрбајҹан вә рус бөлмәләри Шәмси Бәдәлбәјлинин бәдии рәһбәрлији илә јенидән фәалијјәтә башлајыб. Лүтфәли Абдуллајев театрын апарыҹы сәнәткары кими Мусигили Комедија Театрынын, демәк олар, ән популјар, уғурлу вә узунөмүрлү тамашаларында чыхыш едиб.
Актјорун милли вә тәрҹүмә классик әсәрләр әсасында мүасир бәстәкарларын мусиги бәстәләдикләри комедијалардакы Кәрим (“Ләнкәран ханынын вәзири”, Мирзә Фәтәли Ахундзадә вә Нијази), Гуламәли (“Дәрвиш Мәстәли шаһ”, Мирзә Фәтәли Ахундзадә вә мусиги тәртибчиси Шәмсәддин Фәтуллајев), Труфалдино (“Ики ағанын бир нөкәри”, Карло Һалдони вә мусиги тәртибчиси Шәмсәддин Фәтуллајев), Һаҹы Гара (“Һаҹы Гара”, Мирзә Фәтәли Ахундзадә вә Васиф Адыҝөзәлов илә Рамиз Мустафајев), Баггал (“Кечмишин мәишәт сәһнәләри”, Мирзә Әләкбәр Сабирин сатирик шеирләри әсасында либретто мүәллифи Солтан Дадашов вә бәстәкар Васиф Адыҝөзәлов) ролларыны да бураја дахил етмәк олар.
Лүтфәли Абдуллајев һәм дә популјар кино актјору иди. Кинода илк иши Рза Тәһмасибин 1945-ҹи илдә лентә алдығы “Аршын мал алан” филминдә Вәли ролу олуб. О, һәмчинин “Әһмәд һарададыр?” (Зүлүмов), “Улдуз” (Мәһәммәд), “Гәрибә әһвалат” (Кефҹилов) филмләринә чәкилиб.
Л.Абдуллајев 1943-ҹү илдә Әмәкдар, 1960-ҹы илдә исә Халг артисти фәхри адына лајиг ҝөрүлүб. Севилән актјор 1973-ҹү ил декабрын 9-да Бакыда вәфат едиб. Икинҹи Фәхри хијабанда дәфн олунуб.
АБНА- Хәбәр Аҝентлији
Диггәт: Хәбәрдән истифадә етдикдә мәнбәјә истинад лазымдыр