Әһли Бејт -АБНА- хәбәр аҝентлији- Исламын беш әсасларындан бири дә Мәаддыр. Бу мөвзунун әһәмијјәти о гәдәр бөјүкдүр ки, чох аз алим тапылар ки, онун һаггында һеч данышмасын. Мәадшүнаслар бу һагда чох сајда нәзәријјәләр ирәли сүрмүшдүләр. Бу бәһсдә һејванларын мәадына да ишарә едилмишдир.
Һејванларын да Гијамәт ҝүнү һәшр олаҹагларына даир Гуран ајәләри мөвҹуддур. “Јер (үзүн)дә елә бир һәрәкәт едән һејван вә ики ганады илә учан елә бир гуш јохдур ки, (јарадылышынын һәдәфи, өмүр мүддәтинин мүәјјәнләшдирилмәси, нәслинин артымы вә һәјат тәрзи бахымындан) сизин кими үммәтләр олмасынлар. Биз Өз китабымызда (бәјан етмәк бахымындан Лөвһи-Мәһфуз китабында вә јаратмаг бахымындан Тәквин китабында) һеч нәји нәзәрдән гачырмамышыг. Сонра онлар (Гијамәт ҝүнү) һамылыгла (өлдүкләри јерләрдән) өз Рәббләринә тәрәф топланылаҹаглар”. (“Әнам” 38).
“Бүтүн вәһши һејванларын (бир јерә) топланаҹағы (өз өлүм јерләриндән чыхаҹаглары) заман”. (“Тәквир” 5).
Ајәтуллаһ Муһәммәдһүсејн Тәбатәбаи, Әлламә Муһәммәдһүсејн Теһрани, Ајәтуллаһ Мәкарим Ширази һејванларын да мәады олдуғуну гәбул едән алимләрдәндир. Онун исбаты үчүн дәлилләр дә ҝәтирмишдиләр. “Әл-мизан” тәфсир китабында јазылыб ки, һејванлар да инсанлар кими Гијамәт ҝүнү мәһшур олаҹаглар. Онларын мәһшәри дә инсанларынкына бәнзәјәҹәкдир. Әмәлләри һазыр олаҹаг вә онлара да саваб вә әзаб вериләҹәкдир.
Һәдисләрә нәзәр саланда да бу һагда чох сајда һәдисә раст ҝәлмәк олур. Әбазәрдән нәгл едилир ки, бујуруб: “Биз Пејғәмбәрин (с) хидмәтиндә идик. Бизим гаршымызда ики кечи бујнуз тоггушдурурду. Пејғәмбәр (с) бујурду: “Билирсиниз, бунлар нијә бујнуз тоггушдурурлар?”. Орада оланлар дедиләр: “Хејр”. Һәзрәт Пејғәмбәр (с) бујурду: “Анҹаг Аллаһ билир нијә. Тезликлә онларын арасында һакимлик едәҹәкдир””.
Бу дејиләнләрдән белә нәтиҹә чыхартмаг олар ки, һејванларын да мәады вардыр вә онлар да Гијамәт ҝүнү мәһшәрә чәкиләҹәк вә онлара да саваб вә әзаб вериләҹәкдир.
Диггәт: Хәбәрдән истифадә етдикдә мәнбәјә истинад лазымдыр