Әһли-Бејт
(әлејһимус сәлам) Хәбәр Аҝентлији – АБНА: Дүнән ахшам Иран Ислам Республикасынын
Хариҹи Ишләр Назири Һүсејн Әмир Абдуллаһиан Чин Халг Республикасынын хариҹи ишләр
назири Ванг Ји илә чохтәрәфли вә реҝионал әлагәләр, хүсусилә Фәләстиндә баш верән
сон һадисәләрлә бағлы телефон данышығы апарыб.
ИИР Хариҹи Ишләр Назири АБШ-ын Гәззада сојгырымын дајандырылмасы илә бағлы гәтнамәјә вето гојмасындан наразылығыны ифадә едәрәк, Чинин реҝионда сүлһ вә сабитлијин бәргәрар олмасы үчүн конструктив сәјләринә вә Гәззаја гаршы мүһарибәнин дајандырылмасында фәал рол ојнамасынын ваҹиблијинә ишарә едиб.
Әмир Абдуллаһиан чинли һәмкарына билдириб:
“Реҝионун тәһлүкәсизлији һамымыз үчүн ваҹибдир вә бу бахымдан Иран Ислам Республикасы реҝион өлкәләри илә бир нечә мәсләһәтләшмәләр апарыб...
Бөлҝәдәки мүһарибәнин әһатә даирәси ҝенишләниб вә Гәззаја һүҹумлар дәрһал дајандырылмаса, бөлҝәдә партлајыш еһтималы вар вә нәзарәт бүтүн тәрәфләрин әлиндән чыхаҹагдыр...
Тәәссүф ки, Америка тәрәфи мүһарибәнин әһатә даирәсини даһа да ҝенишләндирмәк тәһлүкәсини дүзҝүн дәрк етмир. Ағ Евин мүттәфиги Нетанјаһунун һәјаты анҹаг мүһарибә вә сојгырымын давамындадыр вә реҝионда вәзијјәт белә галмајаҹаг.”
Чинин хариҹи ишләр назири дә Гәззада атәшкәс гәтнамәсинә вето гојулмасындан тәәссүфләндијини билдириб.
Чин үчүн атәшкәсин јарадылмасы вә дәрһал һуманитар јардым ҝөндәрилмәси ваҹибдир.
О үмид етдијини билдириб ки, БМТ Баш Ассамблејасынын гаршыдан ҝәлән иҹласы реҝионда атәшкәсин јарадылмасы үчүн фүрсәт олаҹаг.
Сонда тәрәфләр икитәрәфли мүнасибәтләрин тәрәггисиндән мәмнунлуг ифадә едәрәк, икитәрәфли мәсләһәтләшмәләрин вә диалогларын давам етдирилмәсини вә чохтәрәфли әмәкдашлығын ҝүҹләндирилмәсини вурғулајыблар.
Диггәт: Хәбәрдән Истифадә Етдикдә Мәнбәјә Истинад Лазымдыр!