Әһли-Бејт
(әлејһимус сәлам) Хәбәр Аҝентлији – АБНА: Ермәнистанын баш назири Никол Пашинјан
тәрәфдарларына истефаја ҝетмәјәҹәјини билдириб. Бу барәдә "Һрапарак" гәзети
јазыб.
Нәшр гејд едиб ки, өтән ҝеҹә һөкумәт бинасы јахынлығында етираз аксијалары фонунда Пашинјан тәрәфдашлары илә ҝөрүшүб онлара истефа вермәјәҹәјини вә нәјин баһасына олурса-олсун һакимијјәти сахлајаҹағыны бәјан едиб. Баш назирин бу ачыгламасындан сонра мејдандакы тәһлүкәсизлик гүввәләри етиразчылара гаршы даһа сәрт тәдбирләрә кечибләр.
Хатырладаг ки, сентјабрын 19-да Азәрбајҹан Республикасы ордусу өз суверен әразисиндә сепаратчы ермәниләрә гаршы антитеррор әмәлијјатлара башладыгдан сонра Ермәнистан баш назири Никол Пашинјан долајысы илә билдирди ки, бу әмәлијјатын вә Гарабағда ҝедән һадисәләрин Ермәнистана аидијјаты јохдур. Никол Пашинјанын бу мөвгеји бәзи реваншист ҹәрәјанларын Ирәванда күтләви етираз аксијалары кечирмәсинә сәбәб олду. Етиразчылар Ермәнистан һөкумәт башчысыны гоншу өлкәнин суверин әразиләриндә ҝедән антитеррор әмәлијјатларына һәрби мүдахилә етмәдијинә ҝөрә дөвләтә хәјанәтдә иттиһам едәрәк истефасыны тәләб едирләр.
Азәрбајҹан Республикасы президенти Илһам Әлијев дүнән ахшам телевизијадан халга етдији мүраҹиәтиндә Никол Пашинјанын Гарабағда ҝедән антитеррор әмәлијјаты барәдәки мөвгејини мүсбәт гијмәтләндирди.
Иранын Хариҹи Ишләр Назирлијинин рәсми нүмајәндәси Насир Кәнани дә бу ҝүн бир бәјанатда Азәрбајҹан Республикасы дөвләти илә Гарабағ ермәниләринин нүмајәндәләри арасындакы разылашманы мүсбәт гијмәтләндирәрәк билдириб ки, Иран Ислам Республикасы галан мәсәләләрин Азәрбајҹан Республикасы әрази бүтөвлүјү чәрчивәсиндә динҹ механизмләрлә вә диалог јолу илә һәлл олунаҹағыны ҝөзләјир. Кәнани хатырладыб ки, артыг бунан сонра тоггушмалара сәбәб галмыр вә үмид едирик бундан сонра реҝионда һеч бир мүһарибәнин шаһиди олмајаҹағыг.
Иран Хариҹи Ишләр Назирлијинин сөзчүсү сентјабрын 19-да Азәрбајҹан Республикасы ордусунун Гарабағда сепаратизмә гаршы әмәлијјатларына мүнасибәт иблдирәркән дә Иранын принсипиал мөвгеләрини бир даһа вурғуламышды. О билдириб ки, Иран Ислам Республикасы Гарабағы Азәрбајҹан Республикасынын бир һиссәси һесаб едир вә Гарабағ барәдә мөвҹуд бүтүн мәсәләләрин, еләҹә дә орада јашајан сакинләрин һүгуг вә тәһлүкәсизлик мәсәләләринин бу чәрчивәдә вә диалог јолу илә һәлл едилмәсинә чағырыр.
Кәнани бир даһа реҝион өлкәләринин мүнагишәләрин сүлһ јолу илә һәллинә көмәк едилмәсини вурғуламыш вә Иран Ислам Республикасынын бу саһәдә 3+3 форматында ҝөрүш кечирмәјә һазыр олдуғуну хатырладыб.
Диггәт: Хәбәрдән Истифадә Етдикдә Мәнбәјә Истинад Лазымдыр!