Әһли-Бејт
(әлејһимус сәлам) Хәбәр Аҝентлији – АБНА: Сентјабрын 20-дә Милли Мәҹлисин Иранла
парламентләрарасы әлагәләр үзрә ишчи групу үзвләринин Иран Ислам Республикасы Ислам
Шурасы Мәҹлисинин үзвләри илә ҝөрүшү кечирилиб.
Милли Мәҹлисдән верилән хәбәрә ҝөрә, Иранла парламентләрарасы әлагәләр үзрә ишчи групунун үзвү Ҹаваншир Пашазадә Иран нүмајәндә һејәтини саламлајараг, өлкәләримиз арасында әлагәләрин инкишафындан сөһбәт ачыб. О, бу ҝүнләрдә Азәрбајҹанын Гарабағ бөлҝәсиндә Ермәнистан силаһлы гүввәләри тәрәфиндән төрәдилмиш тәхрибатлара ҹаваб олараг, һәјата кечирилән анти-террор тәдбирләри барәдә данышыб, бу тәдбирләр нәтиҹәсиндә шәһид оланлара рәһмәт диләјиб.
Депутат өлкәмизин реҝионда сүлһә, әмин-аманлыға өнәм вердијини, дөвләтләр арасында достлуг мүнасибәтләринин инкишафында мараглы олдуғуну сөјләјиб. О, Иранла мүхтәлиф истигамәтләрдә, о ҹүмләдән игтисади, тиҹари, лоҝистика саһәләриндә әлагәләрин ҝенишләндирилмәсинин әһәмијјәтиндән данышыб, халгларымызын ејни тарихә, динә, мәдәнијјәтә малик олдуғуну дејиб.
Өлкәләримизин парламентләри арасындакы мүнасибәтләрә тохунан Ҹаваншир Пашазадә бу әлагәләрин инкишафында гаршылыглы сәфәрләрин вә парламент достлуг групларынын әһәмијјәтиндән данышыб.
Иранла парламентләрарасы әлагәләр үзрә ишчи групунун үзвү, Гәрби Азәрбајҹан Иҹмасынын сәдри Әзиз Әләкбәров Азәрбајҹанла Иран арасында әлагәләрин дәрин тарихи көкләрә малик олдуғуну гејд едиб. О, узун илләр әрзиндә азәрбајҹанлыларын Ермәнистандан депортасија едилдијини, орада азәрбајҹанлылара аид тарихи, мәдәни абидәләрин мәһв едилдијини диггәтә чатдырыб. Депутат рәһбәрлик етдији иҹма тәрәфиндән бунунла бағлы мөтәбәр бејнәлхалг тәшкилатлара мүраҹиәтләр үнванландығыны, һазырда Гәрби Азәрбајҹана Гајыдыш Консепсијасы әсасында Ермәнистан әразисиндән говулмуш азәрбајҹанлыларын өз јурдларына тәһлүкәсиз шәкилдә гајытмасыны тәмин етмәк истигамәтиндә аддымларын атылдығыны билдириб.
Иран парламентинин үзвләри Заһеди Моһәммәд Меһди, ханым Пашаји Бәһрам Мәсумә, Әлизадә Әли сәмими ҝөрүшә ҝөрә тәшәккүрләрини ифадә едибләр, Азәрбајҹан вә Иранын ортаг тарихи вә мәдәни дәјәрләрә малик олдуғуну сөјләјибләр. Гонаглар Иранын Азәрбајҹанла мүхтәлиф саһәләрдә даһа сых әмәкдашлығын инкишафында мараглы олдуғуну, игтисади саһәдә әлагәләрин ҝенишләндирилмләси үчүн ҝениш потенсиал имканларын мөвҹудлуғуну гејд едибләр.
Иранлы депутатлар өлкәләринин Азәрбајҹанын әрази бүтөвлүјүнү даим дәстәкләдијини билдирәрәк, Гарабағын Азәрбајҹан торпағы олдуғуну вурғулајыблар, өз үрәк сөзләрини сөјләјибләр.
Сөһбәт заманы дөвләтләрарасы мүнасибәтләрин мөһкәмләндирилмәси, парламентләр арасында әлагәләрин инкишафы, бир сыра диҝәр гаршылыглы мараг доғуран мәсәләләр әтрафында фикир мүбадиләси апарылыб.
Ҝөрүшдә Иран Хариҹи Ишләр Назирлијинин нүмајәндәси Һәсәни Рыза, Иранын Азәрбајҹандакы сәфирлијинин тәмсилчиси Ағаји Мүсәви Мәлики вә диҝәр рәсми шәхсләр иштирак едибләр.
Диггәт: Хәбәрдән Истифадә Етдикдә Мәнбәјә Истинад Лазымдыр!