Чехијада сәфәрдә олан Никол Пашинјан ермәни иҹмасынын үзвләри илә ҝөрүш заманы дејиб: “30 ил фундаментал проблеми анламадан өз мүгәддәратыны тәјин етмәкдән данышдыг, проблемимизә там диагноз гојмадыг, һалбуки реаллығы дәрк етмәлијик”.
Ермәнистанын баш назири Бакынын Ермәнистана “һәлә дә ишғал алтында олан сәккиз кәнди” гајтармасы тәләбинә ҹаваб олараг гејд едиб ки, ермәни кәндләри дә Азәрбајҹанын ишғалы алтындадыр.
“Онларын дәјишдирилмәси вә ја гајтарылмасы мәсәләси ҝүндәмдәдирми” суалына Пашинјан белә ҹаваб вериб: “Әҝәр Азәрбајҹан онлары гајтармаға һазырдырса, биз дә һазырыг.”
Пашинјан сонра мүхалифәтин Гарабағла бағлы иттиһамларына ҹаваб олараг дејиб: “Мән Гарабағы тәһвил вермәмишәм. 2018-ҹи илдән бәри әлимдән ҝәлән һәр шеји етмишәм ки, мүдафиә ордусу мүһарибәјә һазыр олсун. 1994-ҹү илдә биз галиб ҝәлдик, амма бундан сонра Ермәнистанын вә Гарабағын әһалиси азалмаға, Азәрбајҹанын әһалиси исә артмаға башлады. Дејирсиниз ки, Гарабағы мән тәһвил вермишәм? Јохса 10 нојабр бәјаннамәсини нәзәрдә тутурсунуз? Данышыглар просеси заманы торпагларын ҝүзәштә ҝедилмәси әсас мәсәлә иди. 10 нојабр бәјаннамәсини она ҝөрә имзаладым ки, әкс тәгдирдә 30 мин әсҝәримизин әсир алынаҹағыны ҝөрүрдүм. 30 ил әрзиндә Гарабағда нә гәдәр адам јашајыб? Бу торпагларда бизим әсҝәрләримиз үчүн һансы әлавә дәјәрләр јарадылыб? Һеч нә едилмәјиб. Гәләбә илә газанылмыш торпағы тәрк едәрәк ҝәлиб бурада хошбәхт һәјат јашајан сизләр о торпағы тәһвил вермисиниз”, дејә Пашинјан Прагдакы ермәни иҹмасынын нүмајәндәләринә өз фикрини изаһ едиб.
342/