Әһли-Бејт (әлејһимус сәлам) – Хәбәр Аҝентлији АБНА: “Ҝеомагнит
гасырғаларынын организмә бир чох мәнфи тәсирләри ола биләр. Бу, даһа чох үрәк, ган-дамар
вә синир системинә мәнфи тәсир едир. Атмосфер тәзјигиндә баш верән дәјишикликләр
артыг чәкили, үрәк-дамар проблемләриндән әзијјәт чәкәнләр, инфаркт кечирмиш шәхсләр
үчүн даһа чох нараһатлыг јарадыр.”
Буну е-тибб.аз-а кардиолог Огтај Мусајев дејиб. Онун сөзләринә ҝөрә, гејд олунан хәстәликләрдән әзијјәт чәкән, еләҹә дә јашлы инсанлар електромагнит далғаларында олан дәјишикликләри даһа чох һисс едирләр.
Һәким билдириб ки, магнит гасырғасынын тәсирләри әсасән бир нечә ҝүн бүрузә верир. Даһа чох метеоһәссас инсанларда тәзјигин бирдән-бирә дәјишмәси гејдә алыныр. Бу мүддәтдә тамамилә сағлам инсанларда белә, ган тәзјигинин јүксәлмәси һаллары олур.
О, ҝеомагнит гасырғасы ҝөзләнилән ҝүнләрдә Ҝүнәш шүаларынын бирбаша тәсири алтында, ачыг һавада олмамағы, саат 10-дан 17-18-ә гәдәр бајыра чыхмамағы, сәрин јердә вахт кечирмәји, ҝүн әрзиндә 2 литрәдәк маје гәбул етмәји төвсијә едиб. Һәким вурғулајыб ки, тәзјиг јүксәлмәси, үрәк тутмалары, башга һәр һансы нараһатлыг јаранарса, мүтләг һәкимә мүраҹиәт етмәк лазымдыр.
Невролог Наилә Әләкбәрова да гејд едиб ки, ҝеомагнит гасырғасы невроложи хәстәликләр ичәрисиндә әсасән инсулт рискини артырыр. Апарылан тәдгигатлар ҝөстәрир ки, Ҝүнәшин солар активлији артдыгҹа мүхтәлиф јаш групларында да инсулт риски артмыш олур. Ашағы дәрәҹәдә ҝеомагнит гасырғасы 7-12 фаизә гәдәр, ҝүҹлү гасырға исә 41 фаизә гәдәр инсулт рискини артыра биләр.
Мүтәхәссис әсасән, тәзјиг, шәкәр хәстәләрини, инфаркт, инсулт кечән шәхсләри диггәтли олмаға чағырыб. Онун сөзләринә ҝөрә, инсулт кечирән хәстәләрин бу ҝүнләрдә ган тәзјиги, шәкәр кими әлавә проблемләрини нәзарәтдә сахламалары мәсләһәтдир. Бундан башга, голларда, ајагларда ҝүҹсүзлүк, ҝөрмә позулмасы, баш ағрысы, кими шикајәтләри оланлар вахт итирмәдән һәкимә мүраҹиәт етмәлидирләр.
Диггәт:
Хәбәрдән Истифадә Етдикдә Мәнбәјә Истинад Лазымдыр!