Милли Шуранын сәдри, профессор Ҹәмил Һәсәнли Әлијевләр һакимијјәтинин азәрбајҹанчылыг барәдә тәблиғатларынын јалан олдуғуну билдириб.
Ҹәмил Һәсәнлинин апардығы арашдырмаја әсасән, Һејдәр Әлијев 1969-ҹу илдә рәһбәрлијә ҝәләндән сонра республика партија тәшкилатында бүтүн јазышмалары вә мүзакирәләри рус дилиндә кечирди. Һәтта республика дахилиндә олан бүтүн идарә-мүәссисәләрә ҝөстәриш верилди ки, Мәркәзи Комитәјә мәктублары рус дилиндә ҝөндәрсинләр. Јалныз Јазычылар Иттифагы бу ҝөстәришә риајәт етмәди.
Профессорун фикринҹә, Һејдәр Әлијев 1971-ҹи илин октјабр ајынын 29-да Азәрбајҹан Коммунист Партијасы Мәркәзи Кимитәсинин пленумундакы мәрузәси илә милли һисләрин үзәриндән чалын чарпаз бир хәтт чәкди. Бунун үчүн һәмин мәрузәнин 1971-ҹи илин нојабрын 2-дә “Коммунист” гәзетиндәки гысалдылмыш мәтнинә бахмаг јетәрлидир. Һәмин мәрузәдәки тәнгиддән сонра Бәстәкарлар Иттифагынын сәдри Гара Гарајев Азәрбајҹандан ҝетмәли олду, Енсиклопедијанын 20 мин тиражла нәшр едилмиш биринҹи ҹилди һәр јердән јығышдырылыб мәһв едилди, “Гобустан” журналы түркчүлүјү јајмагда иттиһам едилди, танынмыш тарихчиләр Зија Бүнјадов, Маһмуд Исмајылов, Сүлејман Әлијаровун тәгиби башлады, вәфат етмиш анасыны молла илә дәфн етдијинә ҝөрә бәстәкар Муса Мирзәјевин мәсәләси Бәстәкарлар Иттифагынын партија тәшкилатында мүзакирә едилди вә саир. Инди бүтүн бунлар зијалылара гајғы кими ҝөстәрилир.
342/