Ермәнистан тәрәфи Азәрбајҹаны аксија илә Гарабағ ермәниләрини блокадаја алмагда вә һуманитар бөһран јаратмагда иттиһам едир. Һәтта бу мәсәләјә өтән илин декабрында Авропа Инсан Һүгуглары Мәһкәмәсиндә (АИҺМ) дә бахылыб. Декабрын 21-дә АИҺМ Лачын дәһлизи илә бағлы Азәрбајҹан үзәринә өһдәлик гојуб. Мәһкәмә Азәрбајҹанын тибби јардыма еһтијаҹы олан ағыр хәстәләрин дәһлиздән Ермәнистана апарылмасынын тәмин олунмасындан өтрү ҝәрәкән бүтүн тәдбирләри ҝөрмәсини истәјир. Гәрарда һәмчинин, јолда сығынаҹагсыз галмыш, јахуд јашам үчүн васитәләрә еһтијаҹы оланларын тәһлүкәсиз кечидинин тәмин едилмәси өһдәлији гојулуб.
Президент Илһам Әлијев исә јанварда јерли телеканаллара мүсаһибәсиндә билдирмишди ки, мәгсәд блокада дејил вә тәләбләр там әдаләтлидир: "Мониторинг, тәфтиш, ганунсуз истисмарын дајандырылмасы тәләб едилир вә биз буна наил олаҹағыг".
Азәрбајҹан рәсмиләри бу ајын орталарында исә дејибләр ки, декабр 12-дән етибарән Русија сүлһмәрамлыларынын вә Бејнәлхалг Гырмызы Хач Комитәсинин хәтти илә јолдан 4 миндән артыг нәглијјат васитәси, тибби јардыма еһтијаҹы олан 150-дән чох шәхс кечиб.
Бәс бу аксија нә гәдәр давам едәҹәк? Туран хәбәр аҝентлији бу барәдә Милли Мәҹлисин Бејнәлхалг мүнасибәтләр вә парламентләрарасы әлагәләр комитәсинин үзвү Елман Нәсировун фикрләрини өјрәниб . О билдириб ки, екофәалларын аксија кечирмәләринә конкрет сәбәбләри вә мотивләри вар: "Бу аксијанын башламасына ҝәтириб чыхаран сәбәбләр гисмән арадан галдырылыб. Нәтиҹәләр дә вар. Мәһз бу аксијанын бирбаша тәсири нәтиҹәсиндә Азәрбајҹанын тәбии еһтијатларынын талан едилмәси, еколожи террор сијасәти дајандырылды вә һәмин јатагларын истисмары дајанмыш олду".
О вурғулајыб ки, һазыркы һәдәф мониторингин тәмин олунмасы, вурулмуш зијанын һесабланмасы вә гаршы тәрәфә тәгдим едилмәсидир: "Бу һәдәфә чатана гәдәр дә аксијанын давам етмәси истисна дејил".
Сијаси Менеҹмент Институтунун рәһбәри Азәр Гасымлы исә билдириб ки, Азәрбајҹан игтидары бу аксија илә һеч нәјә наил ола билмәјиб: "Бу аксија һәтта там әкс еффект верди. Авропа Парламентинин гәтнамәсиндә бу аксија гынанылды, Азәрбајҹан Гарабағда јашајан ермәниләрин нәфәслијини кәсән тәрәф кими гејд олунду. Һәмчинин Авропанын ајры-ајры өлкәләри бунунла бағлы бәјанатлар вердиләр, БМТ-дә бу мәсәлә илә бағлы мөвге сәрҝиләнди. Дүнја иҹтимаијјәти буну мүсбәт гаршыламады вә бу тамамилә Азәрбајҹанын әлејһинә јөнәлди".
Политологун фикринҹә, икинҹи газанан тәрәф Русијадыр.
Сијаси шәрһчи Әрәстун Оруҹлу дүшүнүр ки, Лачын-Ханкәнди јолунда етиразлар јумшаг ҝүҹ аксијасыдыр: "Әслиндә Азәрбајҹан бунунла месаж вермиш олду ки, мән просесләри өз нәзарәтимә гајтармаға чалышырам, бунун үчүн дә әлимдә мүәјјән ресурс вар. Хошбәхтликдән дә антитеррор әмәлијјаты, һәрби аксијалара дејил, јумшаг ҝүҹ аксијасына үстүнлүк верилди".
Амма онун сөзләринә ҝөрә, ејни тәләбләрлә аксијанын 100 ҝүндән чох давам етмәси мүәјјән негатив еффектләр доғуруб: "Онлардан бири дә бејнәлхалг аләмдә Гарабағ ермәниләрин блокадаја алынмасы кими рәј јарадылды. Бу тәблиғат Азәрбајҹанын зијанына ишләди. Азәрбајҹан бу мәсәләнин информасија тәминатыны реаллашдыра билмәди".
Политологун фикринҹә, мәнфи тәрәфләрдән бири дә будур ки, аксија Гарабағ ермәниләрини Русија сүлһмәрамлыларына бир гәдәр дә јахынлашдырды: "Руслар Гарабағ ермәниләринә ҝөстәрдиләр ки, биз олмасаг, Азәрбајҹан сизи блокада илә боғар. Бу мәнада бу, Русијанын марагларыны тәмин етмиш олду".
О һесаб едир ки, Азәрбајҹанын бу аксијадан газанҹлары олса да, иткиләри даһа чох олду.
342/