Пленар иҹласда вә һесабат әтрафында мүзакирәләр заманы Авропа Парламентинин депутатларынын әксәријјәти Азәрбајҹан һакимијјәтини бејнәлхалг өһдәликләри, фундаментал азадлыглары вә инсан һүгугларыны позмагда тәнгид едиб.
Һесабатда гејд олунур ки, АИ Русијанын Украјнаја гаршы мүһарибәси контекстиндә Азәрбајҹанла енержи секторунда әмәкдашлыг әсасында инсан һагларынын вә демократијанын әсасларынын позулмасына ҝөз јуммамалыдыр.
Депутатлар ифадә вә медиа азадлығына гојулан мәһдудијјәтләрин арадан галдырылмасыны, фундаментал инсан һүгугларына һөрмәтин тәмин едилмәсини, сијаси мәһбусларын азад едилмәсини истәјибләр.
Һесабатда Авропа Иттифагы инсан һагларыны кобуд шәкилдә позан Азәрбајҹан рәсмиләринә гаршы шәхси санксијалар тәтбиг етмәјә чағрылыр.
Депутатлар Азәрбајҹан вә Ермәнистан арасында сүлһүн бәргәрар олмасы үчүн тәмаслары алгышлајыб, лакин сәрһәддә зоракылығын артмасындан нараһат олдугларыны билдирибләр.
Депутатлар һуманитар өһдәликләрин јеринә јетирилмәсини вә вәтәндашларын Лачын дәһлизи илә сәрбәст һәрәкәтини тәмин етмәјә чағырыблар
Авропа Шурасы Назирләр Комитәси дә (АШНК) өтән һәфтә Авропа Инсан Һүгуглары Мәһкәмәсинин (АИҺМ) Азәрбајҹанла бағлы үмумиликдә 35 гәрарынын иҹрасыны мүзакирә едиб. Гәрарларын отузуна "Гафгаз Мәммәдов групу" дахилиндә нәзарәт едилир. Групда сәрбәст топлашмаг азадлығы илә бағлы ишләрдән бәһс едилир. Орада, әсасән, азадлыг вә тохунулмазлыг һүгугунун позунтусу таныныб. Гурум бу ишләрлә бағлы ганунвериҹилик сарыдан ислаһатлары зәрури сајыр.
Гејд едәк ки, Украјна мүһарибәси илә бағлы Авропада јаранан енержи бөһранындан сонра би бирлик Русијаны әвәз едәҹәк алтернативләр сијаһысына Азәрбајҹан Республикасыны да дахил едиб. АИ рәсми Бакыдан истәдији имтијазлары алмаг үчүн она гаршы инсан һаглары вә Гарабағдакы ермәниләрлә бағлы тәзјигләрини артырыб.
342/