Туран хәбәр аҝентлији һадисә илә бағлы Азәрбајҹан Республикасы Дахили Ишләр Назирлијиндән мүнасибәт өјрәниб. ДИН Саатлы рајонунда баш верән һәмин инсидентлә бағлы билдириб ки, полис әмәкдашлары ганунсуз аксијада садәҹә ганунвериҹилијә ујғун тәдбирләр һәјата кечириб.
Милли Мәҹлисин Инсан һүгуглары комитәсинин сәдри Заһид Оруҹ исә бу саһәдәки ганунвериҹилик барәдә бунлары дејиб:
“Һөкүмәт һәр заман гејд едир ки, сәрбәст топлашмаг һүгугу илә бағлы санксијалашдырма өзү-өзлүјүндә иҹазә алмагдыр. Бахмајараг ки, бу конститусион һүгугдур вә бүтөвлүкдә өлкә әһалисинин һәр бир фәрдинә, партијасына, гејри-сијаси гүввәләрә, диндара, атеистә аид бир мәсәләдир. Тәәссүф олсун ки, бу ганун әтрафында да мүнасибәтләр һәддиндән артыг сијасиләшиб. Мүхалиф гүввәләр буну мәлумат вермә вә истәнилән әразидә топлашмаг һүгугу кими тәгдим едир”.
Вәтәндаш Һүгуглары Институтунун сәдри Бәшир Сүлејманлынын сөзләринә ҝөрә исә, Азәрбајҹанда узун илләрдир сәрбәст топлашмаг азадлығы мәсәләси проблемдир: “Әввәлләр мүәјјән јерләр ајрылса да, сонрадан бу да арадан галдырылды. Шәһәрин мәркәзиндә етираз аксијаларын кечирилмәсинә иҹра һакимијјәти органлары тәрәфиндән иҹазә верилмир вә бу да сијаси гәрардыр”,-Експерт дејиб. Онун фикринҹә һәтта аксија үчүн мүәјјән јерин ајрылмасы да ганунвериҹилик вә инсан һүгуглары контекстинә ујғун дејил, чүнки мәһдудијјәтләр гојулмамалыдыр.
Бәшир Сүлејманлыја ҝөрә һакимијјәт алтернатив сәсләри ешитмәк истәмир:
“Күтләви аксијалара селектив јанашма вар. Бирдә ҝөрүрсән ки, һөкүмәтјөнүмлү тәшкилатлар һәтта күтләви шәкилдә өз сәрбәст топлашмаг һүгугундан истифадә едәркән һеч бир мүдахилә едилмир, амма сијаси олмајан шәхсләрин етиразына иҹазә верилмир. О ҹүмләдән дә Саатлыда сырф сосиал мәсәләләрлә бағлы кечирилән аксија заманы да ашыры ҝүҹүн тәтбигинә шаһид олдуг”,- Вәтәндаш Һүгуглары Институтунун сәдри Бәшир Сүлејманлы дејиб.
342/