Лондонда метро сүрүҹүләри вә стансија ишчиләри бу ҝүндән етибарән 24 саатлыг тәтил аксијасына башлајыблар, беләликлә пајтахтда минләрлә сәрнишин нәглијјат хаосу илә үзләшиб.
Өтән илин апрелиндә Лондон метросунун сүрүҹүләринин маашлары дөрд иллик бир разылашмаја әсасән, 8,4 фаиз артырылды вә онларын әмәк һаггынын инфлјасија сәвијјәсиндән 0,2 фаиз јухары һесабланмасы гәрара алынды.
Амма билдирилир ки, ишәҝөтүрәнләр коронавирус пандемијасынын вурдуғу ағыр зијаны компенсасија етмәк үчүн стансија ишчиләринин 10 фаизини ихтисар етмәјә вә онларын пенсијаларында дәјишикликләр етмәјә чалышырлар.
Ејни заманда, 61 миндән чох ҝәнҹ һәким әлверишсиз иш шәраити вә гејри-адекват мааша етираз олараг, тәтилә чыхыб. Базар ертәси башлајан бу тәтил он минләрлә мүалиҹә нөвбәсинин вә ҹәрраһи әмәлијјатынын ләғвинә сәбәб олуб.
Британија һөкумәти бу ил үчүн бонус вә ҝәлән ил үчүн гејри-мүәјјән мааш артымы өдәмәјә разылыг вериб, лакин 26 фаиз артымы мүзакирә етмәк истәмир.
Етираз едән һәкимләр тәтилләринин тәсирини артырмаг үчүн хәстәханаларын һәјати ваҹиб шөбәләриндә, хүсусән дә тәҹили јардым шөбәләриндә фәалијјәтини дајандырыблар.
Һәмчинин, бу ҝүн мәктәб мүәллимләри тәтилә чыхыб вә беләликлә, бу өлкәдә минләрлә тәһсил мәркәзи бағланыб. Етиразчылар иш шәраитинин јахшылашдырылмасы вә маашларын артырылмасыны тәләб едирләр.
Бу һадисәләр Британијанын малијјә назиринин бир нечә саата һөкумәтин бүдҹә дүзәлишини елан едәҹәји вахта тәсадүф едир; Амма иҹтимаи иш јерләриндә маашларын артырылмасына үмид јохдур.
Британијада игтисади дурум бир нечә ардыҹыл бөһран сәбәбиндән сон јарым әсрин ән пис вәзијјәтиндәдир. Инфлјасија 10,1 фаизә чатыб ки, бу да сон 40 илин ән јүксәк ҝөстәриҹисидир.
342/