Әһли-Бејт
(әлејһимус сәлам) – Хәбәр Аҝентлији АБНА-нын вердији мәлумата әсасән, Исламофобија
илә бағлы бејнәлхалг конфранс чәрчивәсиндә "Гәрб мәдәнијјәтләриндә мүсәлманларла
бағлы конспироложи нәзәријјәләр: Бөјүк Јердәјишмә Нәзәријјәси" мөвзусунда панел
мүзакирәси кечирилиб.
Тренд-ин мәлуматына ҝөрә, панелдә иштирак едән АБШ-дән олан иштиракчы, Әмәкдашлыг вә Сивилизасијалар Фондунун тәсисчиси вә президенти Мәһәммәд Бәшәр Арафат јени глобал вә трансмилли чәтинликләр барәдә данышаркән билдириб ки, бу, АБШ вә Чин арасында ҝәрҝинликдән, Түркијә, Һиндистан, Иран, Ҹәнуби Америка өлкәләри кими реҝионал ҝүҹләрин марагларынын тоггушмасындан гајнагланыр.
О, һәмчинин, чыхышында гејд едиб ки, ҝәнҹләрин, хүсусилә дә гејри-мүсәлман өлкәләриндән олан ҝәнҹләрин програмлар чәрчивәсиндә бир араја ҝәтирилмәси, онларын маарифләндирилмәси ваҹибдир.
Нотре Дам Университетинин тәмсилчиси, профессор Ибраһим Муса дејиб ки, Исламофобијанын тарихинә бахмаг, она тарихи контекстдән јанашмаг лазымдыр. Профессорун сөзләринә ҝөрә, анти-исламафобик активитсләр конспиролоҝија теориләриндән узаг олмалы, мөвзу илә бағлы мүвафиг билҝијә вә фактлара малик олмалыдырлар.
О, тәгдиматында Авропа сијаси тәсәввүрүндә Исламын јери барәдә данышыб. Кантын, Һеҝелин, Карл Шмиттин, Жак Дерриданын нәзәријјәләриндә Исламла бағлы јанашмалар барәдә мәлумат вериб. Билдириб ки, теоложи вә мәдәни фәргләр мүсәлманларын мөвҹудлугла бағлы иддиаларыны леҝитимисизләшдирмәк үчүн инструмент кими истифадә олунур.
Ҹорҹ Таун Университетиндә Мүсәлман-Христиан Анајышы Мәркәзинин тәдгигатчысы Арсалан Ифтихар чыхышында билдириб ки, гәрбдә Исламла, мүсәлманларла бағлы конспироложи нәзәријјәләрдән ән апарыҹысы "бөјүк јердәјишмә"дир: "Гәрбдә белә бир фикир вар ки, ҝуја мүсәлманлар гәрбә көч едир, онларын малик олдугларыны әлә кечирир, дәјәрләрини дәјишдирирләр, онларын јерини тутмаға чалышырлар".
Арсалан Ифтихар 2019-ҹу илдә Јени Зеландијада мәсҹиддә төрәдилән террор һүҹумунда мәһз "бөјүк јердәјишмә" конспироложи нәзәријјәсинин әсас мотив олдуғуну вурғулајыб.
Исламофобијанын Мониторинги Лајиһәсиндә мүстәгил арашдырмачы Инеке ван дер Валк панел мүзакирәсиндә чыхыш едәрәк билдириб ки, Исламофобија расизмин бир нөвүдүр.
О гејд едиб ки, расизм үч мәрһәләдә гејдә алыныр ки, бунлар да институсионал расизм, сијаси расизм вә фәрдләр арасында расизмдир. Илләр әрзиндә Ислама гаршы кампанијалар апарылыб.
Инеке ван дер Валк билдириб ки, Исламла бағлы мүбаһисәли јанашма бу ҝүн Абропада јалныз ифрат-сағ групларын ҝүндәлијиндә дејил, һәм дә диҝәр сијасәтчиләрин ҝүндәлијиндә раст ҝәлинир.
Панелдә Түркијәнин Јахын Шәрг Арашдырмалары Мәркәзинин (ОРСАМ) директору Аһмет Ујсал да чыхыш едиб. О дејиб ки, Ислама гаршы кампанијалар мүхтәлиф өлкәләр тәрәфиндән фәргли мәгсәдләр үчүн апарылыр.
Аһмет Ујсал әлавә едиб ки, бу ҝүн (админ: Азәрбајҹан кими) бәзи Ислам өлкәләриндә дә исламофобија вар, "онлар сијаси Ислама гаршы мүбаризә үчүн буну едир, башга ҝүҹләр үчүн өлкә дахили дә лоббичилик едирләр".
О чыхышында Ермәнистан вә Азәрбајҹан мүнагишәсиндә мәсәләни христиан-мүсәлман тоггушмасы контекстиндә тәгдим етмәклә бағлы ҹәһдләри хатырладараг буну глобал иҹтимаијјәти јанылтмаға јөнәлдијини вурғулајыб.
Диггәт: Хәбәрдән Истифадә Етдикдә Мәнбәјә Истинад Лазымдыр!