Иран вә Сәудијјә Әрәбистаны арасында 7 иллик әлагәнин кәсилмәсиндән сонра икитәрәфли әлагәләрин бәрпасына даир јекун разылашма сәнәдинин мәһз Чиндә имзаланмасы мүһүм бир һадисә кими гијмәтләндирилмәлидир.
Иран илә Сәудијјә Әрәбистаны арасында мүнасибәтләрин бәрпасы мәсәләси февралын 14-дә президент Рәисинин Чинә мүһүм сәфәри әснасында ҹиддиләшди вә Чин тәрәфинин тәклифләриндән бири олараг Иранла Сәудијјә Әрәбистаны арасында әлагәләрин бәрпасы рәсми Теһрана тәгдим едилди.
Бундан әввәл исә, Сәудијјә Әрәбистаны Чинин васитәчилији илә дипломатик әлагәләрин бәрпасыны хаһиш етмиш вә бу, Иран тәрәфиндән мүсбәт гаршыланмышды. Ҹәнаб Рәисинин Чинә сәфәриндән сонра Әрәбистанла мүзакирәләр үчүн Иран тәрәфдән Али Милли Тәһлүкәсизлик Шурасы катиби адмирал Әли Шәмхани тәјин едилди вә интенсив данышыглара башланылды.
Бу данышыгларда диггәт чәкән мәгам Американын реҝион өлкәләринин мүнасибәтләриндә хач атасы мөвгејиндән чыхарылмасы вә Иранла Сәудијјә Әрәбистаны арасында мүнасибәтләрин бәрпасында Чинин көмәклик ҝөстәрмәсидир. Бу мүһүм разылашма о шәраитдә әлдә едилиб ки, өтән ајлар әрзиндә АБШ сионист режимин дәстәји, медиада психоложи мүһарибә јолу илә Ирана гаршы реҝионда хүсуси атмосфер јаратмаға чалышырды.
Тәсадүфи дејил ки, сионист режимин кечмиш баш назири Нафтали Беннет Иран вә Сәудијјә Әрәбистаны арасында икитәрәфли мүнасибәтләрин бәрпасына даир разылашмаја ҝөрә гәзәб вә кәдәрини дилә ҝәтириб. Бу разылашмаја ҹаваб олараг Беннетт Исраилин баш назири Бенјамин Нетанјаһуја һәмлә едәрәк, Пекин разылашмасынын бәри башдан Исраил үчүн сарсыдыҹы бир зәрбә олдуғуну етираф едиб. Беннет билдириб ки, Сәудијјә Әрәбистаны илә Иран арасында мүнасибәтләрин бәрпасы Исраил үчүн тәһлүкәли һадисә, Иран үчүн исә сијаси гәләбәдир.
Ҝөрүнүр, сөзү ҝедән разылашма сионист режим үчүн доғурдан да фаҹиәдир, һәмчинин Ислам Республикасынын мөвгеләрини зәифләтмәк мәгсәди илә реҝионда тәфригә вә ихтилафлар јаратмаға чалышан Американы сијасәтләри үчүн бөјүк уғурсузлуг һесаб олунур. Инди Иран Ислам Республикасы илә бу өлкәјә тәзјиг етмәк үчүн даим Американын реҝионда голу кими ҝөстәрилән Сәудијјә Әрәбистаны арасында мүнасибәтләрин бәрпасына даир разылашма вә Ислам Республикасы һөкумәтинин гоншулуг сијасәтинин ҝүҹләндирилмәси фактики олараг АБШ-ын реҝионал просесдән кәнарлашдырылмасы илә нәтиҹәләнә биләр.