Азәрбајҹан Республикасы илә Ермәнистан арасында сүлһүн әлдә едилмәси үчүн бир-чох принсипләр үзәриндә разылыг әлдә олунса да, Дағлыг Гарабағ дүјүнү тәрәфләрин бу истәји реаллашдырмасына мане олуб. Конкрет олараг декабрын 12-дән Лачын дәһлизинин бағлы галмасы зиддијјәтләри хејли дәринләшдириб вә рәсми Ирәван Әлијев һакимијјәтини Гарабағ ермәниләринә гаршы сојгырымы сијасәти тәтбиг етмәкдә иттиһам едир. Бу истигамәтдә ермәниләрин аргументи Бејнәлхалг Әдаләт Мәһкәмси тәрәфиндән дә гәбул олунараг, јолун ачылмасы вә ҝедиш-ҝәлишин тәһлүкәсизлији барәдә мүвәггәти гәрар верилиб. Лакин Азәрбајҹан Гарабағ ермәниләринин блокадаја алынмасы иттиһамыны рәдд едәрәк Лачын дәһлизиндә сәрбәст һәрәкәти тәмин етмәкдән бојун гачырыр.
Белә бир мүрәккәб вәзијјәтдә Ермәнистанын баш назири Никол Пашинјан Алманија Федератив Республикасынын парламентариләри илә ҝөрүшдә Азәрбајҹанын иримигјаслы һүҹума һазырлашдығыны иддиа едиб.
Бу арада зиддијјәтләрин сөз атышмасындан даһа критик мүстәвијә кечмәси вә хариҹи мүдахиләнин; о ҹүмләдән дә Русијанын васитәчилији илә ҹәрәјан едән сүлһ просесинә Гәрб дөвләтләринин гарышмасы сүлһ данышыгларынын далана дүшә биләҹәји барәдә нараһатлығы артырыб.
Мартын 5-дә Шуша јахынлығында баш верән ганлы тоггушма, нәтиҹәдә 3 ермәни вә 2 азәрбајҹанлы һәрбчинин һәлак олмасы вәзијјәтин нә јердә олдуғуну ҝөстәрди.
Беләликлә сүлһә олан үмидләр зәрбә алтындадыр. Бир тәрәфдән Илһам Әлијевин бүтүн бејнәлхалг ганунлара арха чевирәрәк Ермәнистана гаршы әрази иддиасы илә чыхыш етмәси, башга тәрәфдән исә Пашинјан һөкумәтинин Гәрбин вәдләринә инаныб сүлһ просесиндә Русијаја дејил Брүссел форматына үстүнлүк вермәси вә Кремлин әсәбини тарыма чәкмәси бөлҝәдә ҝәрҝин вәзијјәт јарадыб. Бу шәраит, тәәссүфләр олсун ки, сонуҹу билинмәјән мүһарибәјә ҝәтириб чыхара биләр.
342/