Армен-Пресс хәбәр верир: Еммануел Макрон февралын 7-дә Ермәнистанын баш назири Никол Пашинјанла телефон әлагәси сахлајараг Лачын дәһлизинин бағланмасы нәтиҹәсиндә Дағлыг Гарабағда јаранмыш һуманитар вәзијјәти мүзакирә едиб.
Е.Макрон дејиб ки, Лачын дәһлизинин фасиләсиз ишләмәси тәмин олунмалыдыр.
Һәмсөһбәтләр һәмчинин Ермәнистан вә Азәрбајҹан арасында мүнасибәтләрин нормаллашдырылмасы, Дағлыг Гарабағ әһалисинин һүгуг вә тәһлүкәсизлијинин горунмасы вә Авропа Иттифагынын Ермәнистандакы мүлки миссијасынын фәалијјәти илә бағлы фикир мүбадиләси апарыблар.
Бу арада Франса Хариҹи Ишләр Назирлијинин мәтбуат катиби Анн Клер Лежандре билдириб ки, Парис Лачын дәһлизинин блокадасындан нараһатдыр.
“Биз Лачын дәһлизинин блокадасындан сон дәрәҹә нараһатыг, Дағлыг Гарабағда ҹидди һуманитар бөһранын реал тәһлүкәси вар”, - дејә Лежандр вурғулајыб.
О һәмчинин Азәрбајҹанла Ермәнистан арасында данышыгларын бәрпа едилмәси вә ҝәрҝинлијин азадылмасы үчүн Франса президентинин өз сәјләрини давам етдирәҹәјини гејд едиб.
Хатырладаг ки, Авропа лидерләринин тәшәббүсү илә башладылан Брүссел ҝөрүшләринә Русија никбин јанашмыр вә данышыгларын үчтәрәфли 10 нојабр 2020-ҹи илдә имзаланмыш бәјанат әсасында давам етмәсинин тәрәфдарыдыр.
Һазырда Брүссел форматындакы сүлһ данышыглары демәк олар арха плана кечиб.
342/