Рәшад Абдуллајевин алдығы “ултрабаһалы” мүлк Лондонун престижли Ҝросвенор мејданында јерләшир.
Мәлуматда дејилир ки, бу дәбдәбәли мәнзил офшор ширкәти васитәсилә алыныб.
Бу да гејд олунур ки, сөзү ҝедән мәнзил узун илләр СОҸАР-ын президенти олмуш Рөвгнәг Абдуллајевин аилә үзвләринә хариҹи өлкәдә аид олдуғу ашкар олунан илк дашынмаз әмлакдыр.
Гејд едәк ки, Илһам Әлијевин сәрәнҹамы илә 2022-ҹи ил февралын 10-да Рөвнәг Абдуллајев Азәрбајҹан Республикасы Дөвләт Нефт Ширкәтинин президенти вәзифәсиндән азад едилиб, сонра исә игтисадијјат назиринин мүавини тәјин едилиб.
Рөвнәг Абдуллајевин һәлә өтән илә гәдәр рәһбәрлик етдији ширкәт фәалијјәтинин гејри-шәффафлығына вә Азәрбајҹан елитасынын иҹтимаи вәсаитләр һесабына варланмасына хидмәт етдијинә ҝөрә сәрт тәнгид олунур.
Мүтәшәккил Ҹинајәткарлыг вә Коррупсијаја Гаршы Мүбаризә Лајиһәси ОҸҸРП-ин арашдырмалары ҝөстәрир ки, Рәшад Абдуллајевин Лондонун ән баһалы мәһәлләләриндә бириндә јерләшән мәнзилинин ады мәхфи офшор ширкәти васитәсилә 2019-ҹу илдә 22.4 милјон доллара алындығы мәлум олуб.
Арашдырмачы журналистләр јазырлар ки, бу чохмәнзилли бинадан вахтилә АБШ Дәниз Донанмасы истифадә едиб.
ОҸҸРП јазыр ки, сөзү ҝедән мәнзил үчүн өдәнмиш пулун мәншәји мәлум дејил. Рәшад Абдуллајев арашдырма мүәллифләринин сорғуларына ҹаваб вермәјиб. Онун атасы Рөвнәг Абдуллајев исә емаил васитәсилә ҹавабында јазыб ки, о оғлунун сөзү ҝедән мәнзили үчүн һеч бир өдәниш етмәјиб вә мәнзилин алынмасы үчүн верилән пулун мәншәји барәдә һеч нә билмир.
Һесабатда дејилир ки, СОҸАР-ын иллик һесабатындан президентин вә онадәк витсе-президентләрин иллик мааш вә мүкафатларынын топлам 800 мин доллардан аз олдуғу ҝөрүнүр. Бу һәм дә ону ҝөстәрир ки, јалныз Рөвнәг Абдуллајевин маашы илә сөзү ҝедән Лондон мәнзилини алмаг мүмкүн олмамалыјды.
342/