БМТ-нин Тәһлүкәсизлик Шурасы дүнән бир бәјанатда иддиа етди ки, Сәнанын мүзакирәләрдәки ифрат тәләбләри БМТ-нин атәшкәс разылашмасынын әлдә олунмасы үзрә сәјләриндә позунтунун јаранмасына сәбәб олуб.
Американын Јәмән мәсәләләри үзрә хүсуси нүмајәндәси Тим Лендер Кинг дә Јәмәндә атәшкәс разылашмасынын узадылмасы һагда Сәнанын даһа чох јумшаглыг ҝөстәрмәсини истәјиб.
Јәмән милли гуртулуш һөкумәтинин мүзакирә һејәтинин үзвү Әбдүлмәлик Әләҹәри БМТ Тәһлүкәсизлик Шурасынын бәјанатына реаксијада дејиб ки, тәҹавүзкар коалисија өлкәләри мүхтәлиф әјаләтләрдә дөвләт ишчиләринин маашларынын тәмин едилмәсиндә мәсулијјәт дашыјырлар, зира онлар нефт вә газ мәнбәләринә јијәлик едирләр.
Әбдүлмәлик Әләҹәри әлавә едиб: Сәуд коалисијасы ја дөвләт ишчиләринин маашларыны өдәмәлидир, ја да ки, нефт һасилатынын идарәчилјини Јәмән милли гуртулуш һөкумәтинә һәвалә етмәлидир. Белә олан һалда, милли гуртулуш һөкумәти бүтүн әјаләтләрдә әмәк һаггыларыны өдәмәјә һазырдыр.
Бу мәсәлә илә бағлы Јәмән силаһлы гүввәләринин тәблиғат идарәсинин рәис мүавини Абдуллаһ бин Амир дә БМТ Тәһлүкәсизлик Шурасынын бәјанатына реаксија вериб: Сәуд коалисијасы бизә маашлары өдәмәк тәклифини версә дә, биз ону гәбул етмәдик. Бизим башгасынын ианәсинә еһтијаҹымыз јохдур. Биз өз мәнбә вә һүгугларымызы тәләб едирик.
Сәна һөкумәтилә сәуд коалисијасы арасындакы икиајлыг атәшкәс 2022-ҹи ил апрелин икисиндә башланды. Ијунун икисиндә БМТ-нин Јәмән мәсәләләри үзрә хүсуси нүмајәндәси Һанс Грундберг билдирди ки, дөјүшән тәрәфләр әсас разылашманын өнҹәки шәртләрилә атәшкәсин даһа ики ај мүддәтинә, јәни августун икисинәдәк узадылмасы барәдә разылыға ҝәлибләр. Августун икисиндә дә Јәмәндә атәшкәс даһа ики ај мүддәтинә узадылды.
342/