Дөвләт Департаментинин нүмајәндәси Нед Прајс чәршәнбә ҝүнү мәтбуат үчүн брифинг заманы билдириб ки, АБШ Азәрбајҹанла Ермәнистан арасында сүлһ просесинә "бир чох каналлар"ла дәриндән ҹәлб едилиб.
“Биз тәрәфләр арасында ҝәрҝинлијин сәнҝимәси мөһкәмләндирмәк үчүн бир нечә сәвијјәдә, бир нечә каналла гаршылыглы фәалијјәт ҝөстәририк”, - дејә АБШ һөкумәтинин рәсмиси вурғулајыб.
Прајс дејиб ки, Ағ Евдә Һаҹыјев вә Григорјанын ҝөрүшү милли тәһлүкәсизлик үзрә мүшавирләр сәвијјәсиндә кечирилиб. Өз нөвбәсиндә дөвләт катиби Блинкен Хариҹи Ишләр назирликләриндән олан һәмкарлары илә данышыглар апарыб. Катиб һәмчинин Ермәнистан вә Азәрбајҹанла лидерләр сәвијјәсиндә дә гаршылыглы әлагә јарадыб.
Сәфир Филип Рикерә ҝәлинҹә, о, "ермәни вә азәрбајҹанлы һәмкарлары илә фәал әлагә сахлајыб", - Прајс әлавә едиб.
Мүшаһидәләр ону демәјә әсас верир ки, АБШ Ҹәнуби Гафгазда Русија илә апардығы нүфуз савашында Ермәнистана хүсуси лојаллыг нүмајиш етдирир. Азәрбајҹана јөнәлик сијасәтдә исә бу өлкәнин мараглары һеч бир вәҹһлә нәзәрә алынмыр. Минск Групунун дирчәлдилмәсинә ҹәһд, Конгресдә Азәрбајҹанын һәрби әмәлијјатларынын писләнилмәси вә Ненси Пелосинин бү ҝүнләрдә Ирәвана нүмајишкаранә сәфәри Бирләшмиш Штатларын икили стандартлардан чыхыш етдијини ҝөстәрир.
Бунунла јанашы Ағ Ев Гарабаға статусун верилмәсиндә исрарлы галараг Азәрбајҹан Республикасынын әрази бүтөвлүјүнү кечмишдәки кими шүбһә алтына алмагда давам едир.
Сентјабрын 27-дә Сүник бөлҝәсинин губернатору Роберт Ғукасјан АБШ-ын Ермәнистандакы Фөвгәладә вә сәлаһијјәтли сәфири Лин Трејсини гәбул едиб.
Ҝөрүшдә Америка сәфири Лин Трејси дејиб: “Ән јүксәк сәвијјәдә биз ҝүҹ тәтбигинин гаршысыны алмаг үчүн һәр шеји едирик”
342/