АБШ президенти Ҹо Бајденин Ермәнистанын мүстәгиллик ҝүнү мүнасибәтилә Никол Пашинјана үнванладығы тәбрик мәктубунда “Дағлыг Гарабағ халгы” гејди диггәт чәкиб.
“Биз Дағлыг Гарабағ халгы да дахил олмагла мүнагишәнин сүлһ јолу илә һәллини тәшвиг етмәк үчүн сизинлә вә гаршы тәрәфлә ишләмәјә давам едәҹәјик” – дејә Бајден вурғулајыб.
Азәрбајҹан мәтбуатынын јаздығына ҝөрә, мүнагишәнин битмәдијини дејән АБШ президентинин сөзләринин изаһы беләдир ки, Вашингтон “һәлл јолуну” тапмаг мәгсәдилә һәм Ермәнистан, һәм Азәрбајҹан, һәм дә “Дағлыг Гарабағ халгы” илә ишләјәҹәк.
Гејд олунур ки, Вашингтонун бүтүн ҹәһдләри Ҹәнуби Гафгаза гајытмаға, тәсир имканларыны ҝүҹләндирмәјә һесабланыб.
АБШ-ын бу мөвгејини Франса да АТӘТ Минск Групунун диҝәр һәмсәдри олараг Франса да бөлүшүр.
Франса президенти Еммануел Макрон Ермәнистан президенти Ваагн Хачатрјана мүстәгиллик ҝүнү илә бағлы ҝөндәрдији тәбрик мәктубунда јазыб ки, Гарабағ мәсәләсиндә Ирәван она архалана биләр: “Франса реҝионунузда сабитлик, сүлһ вә фираванлыг наминә фәалијјәтини давам етдирмәк әзминдәдир. Франса Ермәнистан вә Азәрбајҹан арасында мүнасибәтләрин нормаллашмасы просесини, Гарабағ мүнагишәси илә бағлы вә ондан ирәли ҝәлән мәсәләләрин һәллини гәтијјәтлә дәстәкләјир. Франса АТӘТ-ин Минск Групунун һәмсәдри кими өз ролуна там садиг галараг, тәрәфләр арасында диалогун тәшвиги үзрә Авропа Иттифагынын сәјләрини дәстәкләјир. Бу бахымдан, сиз халгларымызын мәнафејинә шәхси садиглијимә архалана биләрсиниз”, - дејә Франсанын дөвләт башчысы билдириб.
342/