Әһли-Бејт (әлејһимус сәлам) – Хәбәр Аҝентлији АБНА-нын вердији мәлумата әсасән, Азәрбајҹан Хариҹи Ишләр Назирлији Суријада “ИШИД”, әл-Нусра кими вәһһаби террор дәстәләриндә вурушан вә әмәкдашлыг едән Азәрбајҹан Республикасы вәтәндашларынын бу өлкәдән репатрасијасы илә бағлы мәлумат јајыб.
ХИН-дән Тренд-ә дахил олан мәлуматда дејилир:
"2022-ҹи илин 31 март тарихиндә Сурија Әрәб Республикасынын Ҹераблус шәһәриндәки Амерна дүшәрҝәсиндә сахланылан Азәрбајҹан Республикасы вәтәндашы олан 7 нәфәрин репатриасијасы һәјата кечирилиб.
Гејд олунан шәхсләрин өлкәмизә ҝәтирилмәси Азәрбајҹан Республикасынын һөкумәти тәрәфиндән ҝөрүлмүш мәрһәләли вә координасијалы тәдбирләр нәтиҹәсиндә баш тутуб.
Өнҹә вәтәнә репатриасијасы нәзәрдә тутулан вәтәндашларын јери, шәхсијјәти вә Азәрбајҹан Республикасынын вәтәндашлығына мәнсубијјәти мүәјјән едилиб. Даһа сонра әлдә олунмуш разылыг әсасында онларын Түркијә Республикасынын әразисинә кечиди тәмин олунуб.
Бунунла бағлы Ираг вә Сурија Әрәб Республикаларындан Азәрбајҹан вәтәндашларынын репатриасијасына мәсул ишчи група дахил олан аидијјәти дөвләт гурумларынын нүмајәндәләри Түркијә Республикасына езам едилиб. Түркијә Республикасына езам едилмиш нүмајәндә һејәти тәрәфиндән репатриантларын илкин тибби вә психоложи мүајинәси һәјата кечирилиб вә онлара зәрури јардым ҝөстәрилиб. Бундан сонра Азәрбајҹан Республикасынын Түркијә Республикасындакы Сәфирлији тәрәфиндән вәтәндашларымыз “Азәрбајҹан Республикасына гајыдыш шәһадәтнамә”ләри илә тәмин едилмишдир. 2022-ҹи илин 31 март тарихиндә Азәрбајҹан Республикасы нүмајәндә һејәтинин мүшајиәти илә гејд олунан вәтәндашларын Анкара-Бакы рејси илә Азәрбајҹан Республикасына репатриасијасы һәјата кечирилиб.
Азәрбајҹан Республикасынын һөкумәти тәрәфиндән мүвафиг шәхсләрин реинтеграсијасы вә реабилитасијасы үчүн бүтүн лазыми тәдбирләрин ҝөрүлмәси нәзәрдә тутулуб. Репатриасијанын һәјата кечирилмәсиндә Азәрбајҹан Республикасынын аидијјәти дөвләт гурумларынын бирҝә вә әлагәләндирилмиш фәалијјәти һәјата кечирилиб. Бу просесин реаллашмасында Түркијә Республикасы тәрәфиндән ҝөстәрилмиш јардым хүсусилә гејд олунмалыдыр.
Азәрбајҹан Республикасынын һөкумәти милли ганунвериҹилијә вә өлкәмизин тәрәфдар чыхдығы бејнәлхалг мүгавиләләрә ујғун олараг өз вәтәндашларынын һүгуг вә азадлыгларынын горунмасы истигамәтиндә зәрури тәдбирләрин ҝөрүлмәсини давам етдирәҹәкдир".
Хатырладаг ки, Суријада ушаг башларыны кәсмәјә ҝедән вә әсасән Азәрбајҹанын Губа, Гусар, Хачмаз, Закатала, Шәки, Сумгајыт вә Бакы шәһәр вә рајонларындан олан вәһһаби террорчуларынын бөјүк әксәријјәти 2013-ҹү илә кими «Ҹејш әл-Мүһаҹирин вәл-Әнсар» диверсија групунда ҹәмләшимишләр. Террор групунун “әмири” азәрбајҹанлы Әбу Јәһја адлы бири иди. Даһа сонрадан азәрбајҹанлы вәһһабиләр Сурија вә Ирагда әл- Нүсрә вә гондарма ИШИД адлы террор групларына топлашдылар.
2018-ҹи илдә исә, Дөвләт Тәһлүкәсизлији Хидмәтинин (ДТХ) шөбә рәиси Суад Маһмудов журналистләрә ачыгламасында билдириб ки, Суријадакы мүнагишә бөлҝәсинә ҝедән Азәрбајҹан вәтәндашларынын сајы 1000-дән артыг олуб.
С.Маһмудов гејд едиб ки, Шимали Гафгаздакы террор груплашмаларына гошулан Азәрбајҹан вәтәндашларынын сајы онларла өлчүлүрдүсә, Әфганыстан, Пакистан бөлҝәсинә ҝетмиш Азәрбајҹан вәтәндашларынын сајы 300-ә јахын, Суријадакы мүнагишә бөлҝәсинә ҝедәнләрин сајы исә 1000-дән артыг олуб.
Диггәт: Хәбәрдән Истифадә Етдикдә Мәнбәјә Истинад Лазымдыр!