Әһли-Бејт (әлејһимус сәлам) – Хәбәр Аҝентлији АБНА-нын вердији мәлумата әсасән, Азәрбајҹан Республикасынын Хоҹалы рајонунун Пирләр кәнд инзибати әразисинә дахил олан Фәррух кәнди Азәрбајҹан Ордусу тәрәфиндән азад едиләрәк Азәрбајҹанын нәзарәти алтына кечиб.
Русија Мүдафиә Назирлији Азәрбајҹан Силаһлы Гүввәләринин Фәррух кәнди истигамәтиндә мөвгеләрини мөһкәмләндирмәләриндән нараһатлығыны ифадә едән ачыглама јајыб.
Ачыгламада иддиа олунуб ки, Азәрбајҹан “мартын 24-дән 25-дәк Русија, Азәрбајҹан вә Ермәнистан лидерләринин 9 нојабр 2020-ҹи ил тарихли үчтәрәфли бәјанатынын мүддәаларыны позараг, Русија сүлһмәрамлы континҝентинин мәсулијјәт зонасына дахил олуб”.
Азәрбајҹан Мүдафиә Назирлији исә Русија Мүдафиә Назирлијинин бу ачыгламасыны икитәрәфли әлагәләрин маһијјәтинә вә бу илин февралында имзаланмыш мүттәфиглик гаршылыглы фәалијјәти һаггында Бәјаннамәјә "зидд" һесаб едиб.
Азәрбајҹан Мүдафиә Назирлији ачыглајыб ки, Азәрбајҹан Ордусунун бөлмәләри мөвгеләрин вә дислокасија мәнтәгәләринин јерләринин дәгигләшдирилмәси просесини давам етдирир вә бу заман "ҝүҹ тәтбиг етмир".
Азәрбајҹанын 2020-ҹи ил 10 нојабр үчтәрәфли бәјанатына садиг олдуғуну, онун һеч бир мүддәасыны позмадығыны билдирән Мүдафиә Назирлији бу бәјанатын 4-ҹү бәндинә әсасән Ермәнистан ордусунун галыгларынын вә гејри-гануни ермәни силаһлы дәстәләринин Азәрбајҹан әразиләриндән "там олараг чыхарылмасынын индијә гәдәр иҹра едилмәмәсинә" ҝөрә Ермәнистаны иттиһам едиб.
Бундан әввәл Ермәнистан да Азәрбајҹаны 10 нојабр бәјанатынын мүддәаларыны "позмагда" иттиһам етмишди.
Гејд етмәк јеринә дүшәр ки, Русија сүлһмәрамлыларынын һазыркы мандаты гејри-мүәјјәндир. Русија МН-ин иддиаларынын әксини сүбут едән онларла ҝөрүнтү вә видео чәкилиш, медиада јајылан хәбәрләрлә сүбут етмәк олар ки, мәһз Русија сүлһмәрамлылары өзләри 10 нојабр разылашмасынын мүддәаларына әмәл етмирләр. Чүнки үчтәрәфли бәјанатын 4-ҹү бәндинә әсасән, ганунсуз ермәни бирләшмәләри чохдан әразидән чыхарылмалы иди.
Русија сүлһмәрамлыларынын давранышы, еләҹә дә Русија медиасынын һәлә дә террорчулары "республика" кими тәгдим етмәси, рәсми медианын террорчу Араикин "сәрәнҹамларыны" тиражламасы 22 февралда имзаланмыш мүттәфиглик мүнасибәтләри һагда бәјаната зидд һәрәкәтләрдир. Елә бу мүгавиләнин дә сепаратизмә гаршы мүбаризәни еһтива едән мүддәалары кобуд шәкилдә позулур.
Диггәт: Хәбәрдән Истифадә Етдикдә Мәнбәјә Истинад Лазымдыр!