Әһли-Бејт (әлејһимус сәлам) – Хәбәр Аҝентлији АБНА-нын вердији мәлумата әсасән, Пакистан ордусунун сөзчүсү ҝенерал-мајор Бабар Ифтихар бу ҝүн кечирдији мәтбуат конфрансында билдириб ки, Пакистан ордусунун 2021-ҹи илдәки ҝөстәриҹиләри белә олуб: “Өтән ил Иранла сәрһәдин 71%-и вә Әфганыстанла сәрһәдин 94%-дән чоху һасарланыб.”
О, Иран вә Әфганыстанла сәрһәдләрин һасарланмасынын гачагмалчылыг вә гејри-гануни ҝедиш-ҝәлиши азалтдығыны дејиб вә әлавә едиб: “Бу планын мәгсәди давамлы сүлһ јаратмаг вә реҝионал тиҹарәти инкишаф етдирмәклә һәр үч өлкәнин сәрһәд сакинләринин тәһлүкәсизлијини тәмин етмәкдир."
Пакистан ордусунун сөзчүсү Иран вә Әфганыстанла мүштәрәк сәрһәддә бир нечә кечид мәнтәгәсинин тикинтисинин давам етдијини билдириб вә әлавә едиб: “Пакистан сәрһәдләринин һасара алынмасы заманы террорчуларла гаршыдурмаларда чохлу сајда пакистанлы һәрбчи ҝәнҹин һәлак олдуғуну нәзәрә алараг, һөкумәт вә орду нәјин баһасына олурса олсун бу лајиһәләри тамамламагда гәрарлыдыр.”
Талибанын Пакистан-Әфганыстан сәрһәдинин һасарланмасына гаршы чыхмасы илә бағлы зиддијјәтли хәбәрләрә реаксија верән ҝенерал-мајор Бабар Ифтихар дејиб: “Бәзи КИВ-ләр сәрһәд бөлҝәләриндә баш верән һадисәләри вә кичик анлашылмазлыглары бөјүтмәклә һасар планынын тамамланмасынын гаршысыны алмаға чалышыр, лакин Пакистан рәсмиләри Әфганыстан тәрәфи илә әлагә сахлајыр вә бунунла бағлы тәрәфләр арасында лазыми координасија мөвҹуддур.”
Пакистанын һәрби рәсмиси әлавә едиб: “Кечән ил Шимали Вәзиристанда Пакистан-Әфганыстан сәрһәдинин бәзи чәтин бөлҝәләриндә уғурлу әмәлијјатлар һәјата кечирилиб вә бу әразиләр әввәлләр террорчулар үчүн транзит мәнтәгәси олуб вә бу әразиләрдә јерләшән террорчу дәстәләр дармадағын едилиб.”
Диггәт: Хәбәрдән Истифадә Етдикдә Мәнбәјә Истинад Лазымдыр!