Әһли-Бејт (әлејһимус сәлам) – Хәбәр Аҝентлији АБНА: О, мүһарибә башламадан әввәл 2019-ҹу илин ијулун 29-да һәрби хидмәтә јола дүшүр. Хидмәтә башладыгдан 17 ај сонра сентјабрын 27-дә Азәрбајҹан Ордусу Ермәнистанын ишғалына ҹаваб олараг, ҝенишмигјаслы әкс-һүҹум әмәлијјатына башлајыр вә 44 ҝүн давам едән Икинҹи Гарабағ мүһарибәси башлајыр.
Икинҹи Гарабағ мүһарибәсинин унудулмаз исми, “Топчу” ләгәби илә танынан Вүсал Шаһкәримов өз хатирәләрини бөлүшүб.
“Инди өтән или дүшүнәндә, хатырлајанда һәм кәдәр, һәм дә севинҹ һисси кечирирәм. Јахынларымыз, о ҹүр иҝид оғуллар гәһрәманҹасына шәһид олдулар. Гисмәт белә имиш... Торпагларымызы ҝери алмағымыз, галиб олмағымыз, 30 иллик һәсрәтә сон гојулмасы севинҹи исә бир башгадыр. Ону сөзлә ифадә етмәк чәтиндир. Бу севинҹдә мәним дә пајымын олмасы, о дөјүшләрдә Азәрбајҹан әсҝәри кими иштирак етмәјимин гүруруну һәлә дә јашајырам”, - дејә В.Шаһкәримов гејд едиб.
Вүсал дөјүшләрә илк олараг Фүзули рајонундан башладыгларыны дејир:
“Даһа сонра Ҹәбрајыл, Губадлы уғрунда ҝедән дөјүшләрдә иштирак етдим. Сонда һәрби һиссәмизи Шушаја көчүрдүләр. Дөјүшләр битәндән сонра 2021-ҹи илин ијул ајынын 1-дә Шушадан тәрхис олундум. Алты ај артыг, топламда 24 ај һәрби хидмәт ҝөстәрдим. Бунунла да ајрыҹа гүрур дујурам”.
Бир ил бундан өнҹә һәр кәсин фәхрлә пајлашдығы фотону, јәгин ки, хатырлајырсыныз. Бәли, “Топчу” ләгәбини она газандыран һәмин фотонун чәкилмә аныны хатырлајыр, гәһрәманымыз:
“Дөјүшләрдә топу баш тушлајыҹы кими атырдым. Бу сәһнә тәсадүфи епизоддан јараныб. Кадрлар Губадлынын Сарыјатаг кәндиндә дөјүш заманы лентә алыныб. Һәмин ҝүн Мүдафиә Назирлијинин чәкилиш групу әразидә һәјата кечирилән дөјүш тактикаларыны чәкирди.
Һәр бир әсҝәр үзәринә дүшән миссијаны јеринә јетирмәјә чалышырды. Мәним дә фикрим топу сәрраст ишләтмәјимин јанында иди. Белә вахтларда нә чәкилиш групунун, нә дә әсҝәрләрин бир-биринә јахынлашмаға иҹазәси варды.
Елә бу анда белә бир мараглы, тәсадүфи епизод јаранды”.
Бир мүддәт сонра һәмин мәшһур фотону ондан иҹазәсиз спиртли ичкиләрин үзәринә вурурлар. Бундан хәбәри оланда исә дәрһал етираз едир:
“Һәмин вахт мән Губадлы рајонунда идим, дөјүш битмишди. Зәнҝ едиб мәнә дејәндә билдирдим ки, шәклимин спиртли ичкиләрдә олмасыны истәмирәм. Етираз едәндән сонра јығышдырдылар”.
Галибијјәтә гәдәр мүһарибә һәм дә тәһлүкә, өлүм, һәјәҹан һисси јашадыр...
“Дөјүшә сәфәрбәрликлә ҝәләнләрлә бирҝә башладыг. Илк башладығымыз ҝүн горху јох, аз мүддәт һәјәҹан олду. Сонра алышдыг. Фүзули рајонунда дөјүшләрин бириндә унуда билмәдијим бир һадисә јашадым. Дүшмән ордусу јеримизи тапмышды. Дајанмадан мәрми јағдырырдылар. Гәлпә сәфәрбәрликлә ҝәлән әсҝәр јолдашымын белинә дәјди. О ан достума нәсә олар дејә чох горхдум. Шүкүр Аллаһа, ҹидди хәсарәт алмады. Бизим дивизијада шәһид јох, јаралылар олду. Инди һамымызын бир-биримизлә әлагәмиз вар. Јери ҝәләндә ҝөрүшүрүк дә”.
Топчу Вүсал гәләбәдә онун да пајынын олмасыны неҹә бир һисс олдуғуну сөзлә ифадә етмәкдә чәтинлик чәкдијини етираф едир:
“Гысаҹасы дејим ки, бөјүк гүрур һиссидир. Кимләринсә јанында сөһбәт едәндә Азәрбајҹан оғлу, әсҝәр олараг мүһарибәдә иштирак етдијим үчүн фәхр едирәм”.
Гәһрәманымыз Фүзули, Ҹәбрајыл вә Губадлынын ишғалдан азад олунмасы уғрунда ҝедән дөјүшләрдә иштирак етдији үчүн медалларла тәлтиф олунуб.
Һамымызын Топчу Вүсал кими таныдығы гәһрәманымыз һазырда Хачмаз рајон Фөвгәладә Һаллар Назирлијинин дәфтәрханасында карҝүзар кими чалышыр.
Диггәт: Хәбәрдән Истифадә Етдикдә Мәнбәјә Истинад Лазымдыр!