Әһли Бејт (әлејһимус-сәлам) Хәбәр Аҝентлији –АБНА-нын вердији хәбәрә әсасән, Биринҹи Гарабағ Мүһарибәсиндә олдуғу кими Икинҹи Гарабағ Мүһарибәсиндә дә Азәрбајҹан Республикасынын Талыш Бөлҝәси бөјүк әзимкарлыглар нүмајиш етдирмишдир...
“Аллаһу Әкбәр!”, Ја Зәһра!, Ја Зејнәб!,“Ја Әли! Анҹаг Ирәли!”, “Ләббејкә Ја Һүсејн!”, “Ләббејкә Ја Әли!”, “Аллаһ! Муһәммәд! Ја Әли! Кимдир Ахы Ермәни!” нәрәләри илә ермәни үзәринә шығыјыб торпаглары азад едән Талыш Бөлҝәсинин ҹәнҝавәрләри шәһид олдугдан сонра да халг тәрәфиндән бөјүк издиһам вә дини ритуалларла, ҹуши мәрсијәләрлә торпаға басдырылырды.
Белә бир ҹәнҝавәрләрдән бири дә, еркән јашларындан һәр ики валидејнләрини итирмиш, Вәтән мүһарибәсиндә иштирак етмиш Ләнкәранын Осакүчә кәнд сакини, Сејјид Пејғәмбәр (сәлләллаһу әлејһи вә алиһ) өвлады, әсҝәр Мир Әфлатун Фәрәҹовдур...
Бабасы Кәрбәла Фатеһи Имам Һүсејн (әлејһи сәлам) кими дөјүш мејданында мәрдлик ҝөстәрәрәк Гарабағын азадлығы уғрунда ҹаван ҹаныны гојан бу иҝидә өлүмүндән сонра да һагсызлыг давам етди... Она шәһид статусунун верилмәмәси исә һеч дә бир мәналы гаршыланмады. Рајону ајаға галдырды. Бу һагсызлыға гәзәбләнән сакинләр етираза галхараг аксија кечириб, Сејјид Мир Әфлатун Фәрәҹова шәһид статусу верилмәсини тәләб едибләр. Нәши кәндә ҝәтирилән әсҝәрин јахынларына билдирилиб ки, Фәрәҹов машын гәзасында дүнјасыны дәјишиб вә она шәһидлик верилмәјиб...
Амма Ләнкәран шәһәринин зијалыларындан олан Јадиҝар Садыглы фејсбук һесабында әсҝәрин шәһид олдуғуну тәсдигләјән фактын сакинләр тәрәфиндән сүбут олундуғуну, һадисәнин тәфәррүатыны белә јазыб.
“Ләнкәранда рәзаләт баш вериб. Вәтән уғрунда ҹаныны әсирҝәмәјән шәһидләр үчүн мәмурлар пулларыны әсирҝәјирләр, анлашылан.
Ләнкәранын Осакүчә кәндинә бир әсҝәр нәши ҝәтирилиб – Әфлатун Мирҹаһанҝир оғлу Фәрәҹовун. Атасы вә анасы артыг вәфат етмиш бир ҝәнҹин. Һарадаса, һансыса сәвијјәли мәмурлар фикирләшибләр ки, јијәсиз әсҝәрдир, саһиб чыхан олмајаҹаг вә елан едибләр ки, Әфлатун автомобил гәзасы нәтиҹәсиндә һәлак олуб. Долајысы илә, шәһид статусу верилмир, сығорта өдәнилмәјәҹәк, јас мәрасиминә, мәзар дашына мәмурлар да хәрҹ чәкмәјәҹәкләр. Амма кәнд ҹамааты әсҝәри јијәсиз бурахмајыб. Табуту ачыблар вә ҝүллә јараларыны ҝөрүбләр. Әсҝәр шәһид олуб! Бундан сонра кәнд ҹамааты гадынлы-кишили рајон мәркәзинә доғру јүрүшә башлајыб. Јолда полис гаршысыны кәсмәк истәсә дә алынмајыб. Нәһајәт, иҹра башчысы ҝәлиб гаршыларына. Әфлатун Фәрәҹовун шәһид олмасы актлашдырылыб вә јалныз бундан сонра дәфн олунуб.
Гәләбә тәкҹә һакимијјәти ҝүҹләндирмир. Бу халг да әввәлки халг дејил, артыг галиб халгдыр” – Ј. Садыглы гејд едиб.
Ләнкәранын Осакүчә кәнд сакини, Сејјид Пејғәмбәр өвлады, Мир Әфлатун Фәрәҹов Вәтән мүһарибәсиндә гәһрәманҹасына Шәһид олмушдур. Шәһидин ҹәназәси доғулдуғу кәнддә “Һүсејн Шәһиди Кәрбәла! Имам Шәһиди Кәрбала! Һүсејн Вај!” ҹуши мәрсијәләри илә торпаға тапшырылыб. Аллаһ рәһмәт еләсин. Руһу шад олсун! Амин.
Диггәт: Хәбәрдән Истифадә Етдикдә Мәнбәјә Истинад Лазымдыр!