Әһли Бејт (әлејһимус-сәлам) Хәбәр Аҝентлији –АБНА-нын вердији хәбәрә әсасән, "Шәһиди олмајан халгын мәнлији, кимлији билинмәз, азадлығы ҹаны илә, ганы илә газанмајан халг һәр вахт көлә кими ҝөзүгыпыгдыр" - дејибләр. Азәрбајҹан халгы бу ҝүн ҝөзүгыпыг дејилдир, гүрурлудур, чүнки дүшмәнә лајигли ҹаваб верән иҝидләр вәтәнинин галиб халгыдыр...
Азәрбајҹанынын Зәфәр тарихини јазан шәһидләриндән бири дә өз ҹәсурлуғујла јаддашларда из бурахмыш, әмәлијлә шәхсијјәтини тәсдиг етмиш, шәһид полковник-лејтенант Әкбәров Орхан Надир оғлудур.
О, 12 декабр 1982-ҹи ил Биләсувар рајонунда зијалы аиләсиндә анадан олуб. 1989-1997-ҹи илләрдә Саатлы рајону 3 сајлы орта мәктәбдә, 1997-1999-ҹу илләрдә Биләсувар рајону 1 сајлы там орта мәктәбдә тәһсил алыб. Орхан Әкбәров орта мәктәби битирдикдән сонра Али Һәрби Мәктәбә дахил олуб. 2000-2004-ҹү илләрдә Һејдәр Әлијев адына Азәрбајҹан Али Һәрби мәктәбини Гошун Кәшфијјат ихтисасы үзрә битирмиш, 2004-2005-ҹи илләрдә Тәлим-Тәдрис мәркәзиндә ихтисасы үзрә тәһсил алыб. 2005-ҹи илдән Н сајлы кәшфијјат бөлүјүндә кәшфијјат Тағым командири вәзифәсиндә, 2007-ҹи илдән кәшфијјат Бөлүк командири вәзифәсиндә, 2012-ҹи илдән 2020-ҹи иләдәк Н сајлы һәрби һиссәнин Кәшфијјат бөлмәсинин рәиси вәзифәсиндә ишләјиб. 2020-ҹи илин јанвар ајындан шәһид олдуғу тарихәдәк Н сајлы һәрби һиссәнин командири вәзифәсиндә хидмәт едиб.
2016-ҹы илдә Апрел дөјүшләриндә вә 2020-ҹи илдә Товуз истигамәтиндә ҝедән дөјүшләрдә фәал иштирак етдији кими 2020-ҹи ил сентјабр ајында да башланан Икинҹи Гарабағ Мүһарибәсиндә бөјүк шүҹаәтләр ҝөстәриб. Шәһидимиз дүшмәнин 200-дән чох әсҝәрини вә бир нечә силаһ долу машын вә 6 техникасыны мәһв едиб.
Һәјатында Имам Һүсејни өзүнә өрнәк билән полковник-лејтенант Орхан Әкбәров 2 октјабр 2020-ҹи ил Фүзули истигамәтиндә ҝедән дөјүшдә дүшмәнин снајперлә гәфил ачдығы атәш нәтиҹәсиндә гәһрәманҹасына шәһид олуб. Октјабрын 6-сы исә шәһидин нәши ҝөтүрүләрәк Биләсувар рајонунда, уғрунда ҹаныны вердији торпаға Гуран ајәләри охуна-охуна вә Әһли Бејтә (әлејһимус сәлам) мәрсијәләр дејилә-дејилә тапшырылыб.
Гејд едәк ки, Орхан Надир оғлу Әкбәрова өлүмүндән сонра Вәтән Мүһарибәси Гәһрәманы ады верилиб.
Диггәт: Хәбәрдән Истифадә Етдикдә Мәнбәјә Истинад Лазымдыр!