Әһли Бејт (әлејһимус-сәлам) Хәбәр Аҝентлији –АБНА-нын вердији хәбәрә әсасән, Ермәнистан ишғалчы гүввәләринин Азәрбајҹан әлејһинә башлатдығы икинҹи Гарабағ мүһарибәсиндә Азәрбајҹан Шиә халгы биринҹи Гарабағ дөјүшләриндә олдуғу кими мејдана атылараг дүшмән гүввәләринә гаршы амансыз дөјүшләр апардылар...
Бу дөјүшләрдә Азәрбајҹан һәрбичиләри Аллаһ Тәалаја тәвәккүл едиб, Гуран Кәрим, Пејғәмбәр вә Мәсум Имамлара тәвәссүл етмәклә ҝеҹә-ҝүндүз дүшмән гүввәләри үзәринә шығыјырыдылар...
Белә һәрбичиләрдән бири дә Азәрбајҹан Силаһлы Гүввәләринин Хүсуси Тәјинатлы Гүвәләрин баш лејтенанты шәһид Әлигисмәт Мүкафат оғлу Јагублу иди...
ХТГ-нин баш лејтенанты шәһид Әлигисмәт Мүкафат оғлу Јагублу һаггында гардашы Нурлан Јагублу бу сөзләри дејиб:"Биләнләр билир, һәрбидә ибадәт етмәк чох чәтиндир, биз бир дәфә дә олса онун намазыны гәза етдијини ҝөрмәдик".
"Гардашым ушағлығындан намаз, ибадәт әһли олуб. Ән бөјүк арзусу иди шәһадәтә уҹалмаг. Әлигисмәт Имам Һүсејн, Әһли Бејт ашиги иди. Әсҝәрләри дејир ки, һәрбидә олмаларына бахмајараг ибадәт етмәк истәјәнләрә чох јахшы шәраит јарадырмыш. Билирсиз онун һаггында данышмаг мәним үчүн һәм фәхрдир, һәм дә чәтиндир. О фәргли инсан иди. Онун кими дост, ата, һәјат јолдашы, гардаш, оғул дүнјаја аз-аз ҝәлир. Чох фәдакар иди".
Нурлан гардашынын сон дөјүшә гәлпә јарасы илә ҝирмәсиндән дә данышыб:
"Әлигисмәтин дөјүш јолдашы, капитан Ҹејһун Тәһмәзов дејир ки, гардашым ону вә јүзләрлә диҝәр јаралы дөјүшчүләри дөјүш мејданындан чыхарараг өлүмдән хилас едиб. Гардашымын Шушаја јаралы ҝетмәси барәдә Н сајлы һәрби һиссәнин һәкими дә өз хатирәләриндә гејд едиб".
Һәким өз гејдләриндә Азәрбајҹан Силаһлы Гүввәләринин забити Әлигисмәт Јагублу барәдә бу сөзләри әлавә едиб:
"Шуша уғрунда ҝедән дөјүшләрдә санитарлар чох сајда ағыр јаралылар вә шәһидләр ҝәтирирдиләр. Ҝәтирилиләрин әксәријјәтиндә көһнә сағалмамыш јаралар мүшаһидә олунурду. Бизим әсҝәр вә забитләримиз дөјүшә ҝетмәк үчүн ҝүллә вә гәлпә јараларыны тибби персоналдан ҝизләдирмишләр. Дүнја тарихиндә һеч бир мүһарибәдә белә күтләви шәкилдә фәдакарлыг олмајыб.
P.S. Нә гәдәр ағыр олса да буну јазмалыјам. Шәһидимиз Әлигисмәт сон дөјүшә ҝедәндә бәдәниндә гәлпә јарасы вар имиш... ("Ҝөзүмүн ишығы" әсәриндән)"
Әлигисмәт Јагублу 1992-ҹи илдә Лерик рајонунун Кәләхан кәндиндә анадан олуб. 2007-ҹи илдә Лерик шәһәр 3 сајлы орта мәктәбин 9-ҹу синфини битириб. Ҹ.Нахчывански адына Бакы Һәрби Коллеҹинә дахил олуб. Коллеҹи битирәрәк 2010-ҹу илдә Һејдәр Әлијев адына Бакы Али Һәрби Мәктәбинә дахил олуб. 2014-ҹү илдә бураны да мүвәффәгијјәтлә баша вуруб. Даһа сонра ТТМ-и битириб, 2015-ҹи илдә лејтенант рүтбәси илә Гобустанда јерләшән “Н” сајлы һәрби һиссәјә тәјинат алыб. 2015-ҹи илдә өз әризәси илә ҹәбһә бөлҝәсинә ҝедиб вә Бејләган рајонунун Милабаддакы Һәрби Корпусунда хидмәтә башлајыб. Әлигисмәт 2016-ҹы илдә “Апрел дөјүшләри”ндә иштирак едәрәк, гәһрәманлыглар ҝөстәриб. “Апрел дөјүшләри”ндән сонра Гобустана ҝөндәрилиб. 2017-ҹи илдә јенидән өз истәји илә ҹәбһә бөлҝәсинә, Ағҹабәдијә гајыдыб. 2018-ҹи илдән Ҹәлилабадда Хүсуси Тәјинатлы Гүвәләрин баш лејтенанты кими Хидмәт Рәиси вәзифәсини иҹра етмәјә башлајыб. ХТГ-нин идарәетмә забитләриндән олуб.
Әлигисмәт Јагублу ишғал алтында олан торпагларымызын азадлығы уғрунда дөјүшләрдә Хүсуси Тәјинатлы Гүвәләрин забити кими вәтән мүһарибәсиндә иштирак едиб. О, Муров дағ, Фүзули, Ҹәбрајыл, Зәнҝилан, Губадлы рајонунун, Кәлбәҹәр вә Лачынын бир нечә кәндинин азад олунмасында хүсуси гәһрәманлыглар ҝөстәриб. Шуша шәһәринин азадлығы уғрунда ҝедән дөјүшләрдә дүшмәнин хејли сајда ҹанлы гүввәсини мәһв едәрәк сырадан чыхарыб.
Баш лејтенант Әлигисмәт Јагублу 5 нојабр 2020-ҹи илдә Дашалтыда ҝедән дөјүшләрдә гәһрәманҹасына шәһид олуб.
Аиләли олуб, 2 өвлады вар.
Шәһидин үчрәнҝли бајраға бүрүнмүш нәши Кәләхан кәндинә ҝәтириләрәк бөјүк издиһамла торпаға тапшырылыб.
Аллаһ рәһмәт еләсин!
Диггәт: Хәбәрдән Истифадә Етдикдә Мәнбәјә Истинад Лазымдыр!