Әһли Бејт (әлејһимус-сәлам) Хәбәр Аҝентлији –АБНА-нын вердији хәбәрә әсасән, Азәрбајҹан Ислам Партијасынын мәһбәс һәјатндакы сәдри Һөҹҹәтүл Ислам, Доктор Мөвсүмү Сәмәдов Икинҹи Гарабағ Мүһарибәсиндән 4 ҝүн өнҹә Гарабағын ишғалдан азад едилмәси барәсиндә месаж вермишдир.
Доктор Мөвсүм Сәмәдовун тарихи месажыны диггәтинизә чатдырырыг:
Бисми Раббил Һүсејн!
Гарабағ мәсәләси Азәрбајҹан халгы үчүн тәк әрази мәсәләси дејил, һәм дә бир милли гејрәт мәсәләсидир. Һәрчәнд ки, тарихә нәзәр салсаг, бизә һакимијјәт едәнләрин сијаси зәифлији вә сүстлүјү уҹбатындан, сијаси аренада лазымы тәдбирләри вахтында һәјата кечирмәдикләриндән, һабелә, зијалыларымызын сәһнәдә мүнасиб мөвге тутуб лазымынҹа сөз демәдикләриндән, торпагларымыз илләр боју вәһши ермәни террорчулары тәрәфиндән ишғала мәруз галыб. Бунун мүасир тарихимиздә, јәни 1905,1918; 1948-1953 илләрдә вә һәтта, сон дөврләрдә, јәни 1988-ҹи илдә баш вердијинә шаһидик. Белә һәссас мәгамларда дөвләтимиз вә халгымыз даһа мәсулијјәтли олмалы вә торпагларымызын ишғал олунмасына иҹазә вермәмәли иди. Лакин сон ишғалын нәтиҹәсиндә бир сыра һәмвәтәнләримиз, ана-баҹыларымыз вәһшиҹәсинә шәһид едилмиш ја әсир ҝөтүрүлмүшләр ки, бу бизим һејсијјәтимизә вә гејрәтимизә ләкә ҝәтирир. Биз онларын интигамыны алмалы вә әҝәр һәлә дә әсирликдә оланлары варса, азад етмәлијик. Билмәлијик ки, бу тәкҹә Азәрбајҹан халгынын вә һәмчинин, дүнја халгларынын нәзәриндә дејил, Илаһи дәрҝаһда да ваҹиб олан бир мәсәләдир.
Биз бир мүсәлман халгы олараг иҹазә верә билмәрик ки, Вәтәнимиз бир овуҹ ишғалчы тәрәфиндән илләрлә гәсб едилиб зүлмә мәруз галсын вә биз дә буну ҹавабсыз гојаг! Мән Азәрбајҹан халгына вә ҹаванларымыза өз тәшәббүсләри илә сәфәрбәрлик тәләб едиб буну елан етдикләри үчүн тәшәккүр едирәм. Лазым оларса, биз дә зиндандан өз өвладларымызын кәнарында, вәтәнимиз уғрунда дөјүшә ҝетмәјә һазыр олдуғумузу билдиририк. Азәрбајҹан дөвләти бу талејүклү мәсәләдә вә бу тарихи анда өз ағыр мәсулијјәтини дүзҝүн дәрк етмәли вә дүзҝүн гәрарлар вермәлидир. Әкс тәгдирдә вә мәсәләнин узанмасына баис олдугда, онлар Азәрбајҹан тарихи вә Азәрбајҹан халгы гаршысында мәсулијјәт дашыјырлар вә бунун ҹавабыны верәҹәкләр!
Др. Мөвсүм Сәмәдов 24/09/2020
Диггәт: Хәбәрдән Истифадә Етдикдә Мәнбәјә Истинад Лазымдыр!