Әһли Бејт (әлејһимус-сәлам) Хәбәр Аҝентлији –АБНА; “Сәһәр сүбһ намазындан сонра ани ҝөзүмә јуху ҝетди. Ҝөрдүм евин гапысы ачылды. Оғлум о гәдәр ҝөзәлликдә, уҹа бојда, нур үзлә ҝәлмишди ки… Дејирәм, Әсәд, анан гурбан, ҝәлмисән? Дејир һә, амма атама демә. Ҝәлиб отағымызын гапысыны өпдү. Деди “Ана, нечә вахтды о гәдәр әзијјәт чәкирик ки, шәһид олуб инди һаггын дәрҝаһына чатдым вә раһатландым”.
Бу јухуну 44 ҝүнлүк Вәтән мүһарибәсинин шәһид гәһрәманларындан олан 25 јашлы Әсәд Әсәдлинин анасы Сәидә Аббасова ҝөзләри дола-дола данышыр.
Мүһарибәјә көнүллү кәшфијјатчы гисминдә јолланан Ә. Әсәдли аилә үзвләринин чохусунун јухусуна ҝириб. Шәһидлик мәгамына јүксәлдијини исә дајысы гызы Нураја јухусунда дејиб.
Сәидә ананын јухусунда шәһид олдуғу оғлунун ҝүлүшү исә ҝөзүнүн габағындан ҝетмир. Шәһид анасы гапыларынын ачылараг оғлунун һәмин ҝүлүшлә јенә евләринә дахил олаҹағыны ҝөзләјир.
С. Аббасова билдирир ки, сонунҹу дәфә нојабрын 7-дә оғлујла данышыб. Мәлум јухуну исә анасы нојабрын 9-да сәһәр саатларында ҝөрүб:
“...Әсәд чох хејирхаһ, вәтәнпәрвәр бир ушаг иди. Өвладым һаггында данышмаг чох ағырдыр. Савадлы иди, орта мәктәби әлачы кими битириб. Мүәллимләринин севимлиси иди. Онунла мәним мәһәббәтим ана- өвлад мәһәббәти дејилди, бир башга севҝи иди. Она ҝөрә Аллаһ ону мәндән чох тез алды. Мәни һәмишә уҹалардан уҹа јашадаҹағыны сөјләјирди. Мән онун евдән ҝедишини һисс еләдим, дедим ки, бу ҝедиш нормал ҝедиш дејил”.
Атасы Маһир Әсәдов оғлунун ҹәбһәјә јолланмасындан да сөһбәт ачыб :”Билирсиниз ки, Товуз һадисәләриндә ермәниләр атәшкәси позду, ҝенералымыз шәһид олду. О заман биздән хәбәрсиз көнүллү олараг ҝедиб јазылыб. 29 сентјабрда да Сәфәрбәрлик Хидмәтиндән зәнҝ едиб мүһарибәјә чағырдылар. Ҝәлиб һамымызла сағоллашыб ҝетди. Ачығы дилә тутмаг истәдик ки, ҝетмәсин, анасы онколожи хәстәдир. Анҹаг бүтүн һәр шејә рәғмән гәрарыны вермишди. Шәмкирдә көнүллүләрдән ибарәт дәстә јаратдылар. Тәлимләр кечирдиләр.
Нојабрын 2-дә зәнҝ едиб ад ҝүнүмү тәбрик етди. О, һәр шеј үчүн чох тәләсирди... Сон дөјүшү Хоҹавәнд рајону истигамәтиндә јүксәкликдә олуб. Ахыра гәдәр дөјүшүб јараланараг шәһид олуб. ЫЫ Фәхри Хијабанда дәфн едилиб. Тәсәллимиз о олду ки, гәләбә газанмышыг. 21 јаралы әсҝәрин мүһасирәдән чыхарылмасында иҝидлик ҝөстәриб. Ҝөстәрдији гәһрәманлыға ҝөрә дөвләтимиздән она ад верилмәсини истәјирик”.
Әсәдин мүһарибәдә ҝөстәрдији гәһрәманлыглар исә бунларла битмир. Онунла дөјүшмүш гази јолдашлары бу һагда аилә үзвләринә данышыблар.
Шәһидин гардашы Сәмәд Әсәдли билдирир ки, Әсәд Нахчыванда хидмәт едиб вә хидмәтдә ики дәфә тәрифнамә алыб: “Гази јолдашлары дејир ки, 17 ҝүн дөјүшдүкдән әсҝәрләр командирдән бирҹә ҝүнлүк иҹазә алыб истираһәт етмәк истәјибләр. Анҹаг тәкҹә Әсәд истираһәтә ҝетмәјәҹәјини сөјләјиб. Нә гәдәр десәләр ирәли ҝедәҹәјини сөјләјиб.
Бир гази јолдашы да дејир ки, ики јолдаш снајперә туш ҝәлибләр. Әсәд әввәл дејиб ки о кечсин арханҹа өзү ҝәлсин. Сонра дејиб ки јох дајан, кечәрсән бирдән сәни вурарлар. Гој арханҹа ҝәлим, сән биринҹи кеч. Сонра нә о, нә дә јолдашы кечәси олублар. Икиси дә гол гола ҝириб сағ сол јајына-јајына гачыблар. Бу минвалла снајпер ҝүлләси дә торпагдан дәјиб. Бир дөјүшдә силаһ- сурсатлары битиб. Әсәд кечиб ермәниләрин силаһ-сурсатыны ҝөтүрүб онларын силаһыјла вурушуб. Ермәнинин бир танкыны партладыб. Дөјүшләрдә һәртәрәфли шүҹаәт ҝөстәриб. 20 нәфәр чөлдә сојугдан донмуш вәзијјәтдә галыб. Јорған-дөшәкләри дә мәнтәгәдә имиш. Һеч ким јорған-дөшәкләри чыхармаға үрәк етмәјиб. Әсәд ҝедиб ҝәтириб, ахырда өз пушлатыны да чыхарыб достуна вериб. Дејиб ки, о үшүјән дејил. Әслиндә исә мәним гардашым чох үшүјәнди. Сигарет тапыб блок-блок ҝәтириб һамыја пајлајарды. Ахырда өзү дөјүш јолдашы Вәлизадә Һүсејндән сигарет истәјәрмиш. Көнүллү олараг да ән орта ағыр һиссәдә дөјүшмәји сечиб. Сон ҝүнә гәдәр дөјүшүб. О дөјүшдә елә бир шејләр едиб ки, фәхримизә чеврилиб. Дүздүр, һәсрәти адамы јандырыб јахыр. Зәнҝ вураммырсан, сәсини ешидә билмирсән. Анҹаг шәһадәт елә мәгамдыр ки, онун варлығыны даим һисс едирәм”.
Һазырда ҹәбһәдә олан забит дајысынын һәјат јолдашы Ајнур Аббасова да Әсәдин әбәди дүнјанын гәһрәманы олдуғуну диггәтә чатдырыб: “Анҹаг Әсәд гајытсајды, елә бу дүнјамызын да гәһрәманы олаҹагды. Чүнки о һәмишә бизим гәһрәманымыз олуб”.
Диггәт: Хәбәрдән Истифадә Етдикдә Мәнбәјә Истинад Лазымдыр!