Әһли Бејт (әлејһимус-сәлам) Хәбәр Аҝентлији –АБНА-нын вердији хәбәрә әсасән, “Гафгазинфо” һазырда мүалиҹә алан Икинҹи Гарабағ мүһарибәси газиси илә сөһбәтләшиб.
Јусиф Әһмәдову индијә кими идманчы кими таныјырдыг. Кемпо-карате идман нөвү үзрә 4 гат дүнја, 2 гат Авропа чемпиону, (Һејдәр Әлијев кәмәринин саһиби) әмәкдар идман устасыдыр. 44 ҝүнлүк Вәтән мүһарибәси исә бизә ону һәм дә гәһрәман дөјүшчү кими танытды. Октјабрын 20-дән торпагларымызын азадлығы уғрунда мүбаризәјә о да гошулуб. Фүзулидән башлајан дөјүш јолу Хоҹавәндә гәдәр давам едиб.
“Ҹәбһәјә ҝетмәк үчүн Сәфәрбәрлик Хидмәтинә 4 дәфә мүраҹиәт еләдим, нәһајәт, октјабрын 20-дә апардылар. Фүзулидән дөјүшә башладыг, Гаҹар вә диҝәр кәндләрин алынмасында иштирак етдик. Хоҹавәндә гәдәр ҝедиб чыхдыг.
Нојабрын 5-6-да Хоҹавәнд истигамәтиндә дөјүшләрдә иштирак етмишик вә орада машынымыз минаја дүшәрәк 11 метрлик тәпәдән ашағы јуварланыб. Ики шәһид вердик, 9 јаралымыз олду.
Мән дә ағыр јаралыларын ичәрисиндә идим. Сағ ајағымда сыныг, сүмүкдән араланма, сағ вә сол бел фәгәрәләримдә сыныглар вар, синир системим зәдәләниб, бејин силкәләнмәси нәтиҹәсиндә ҝөзләрим зәифләјиб. Һазырда сәһһәтим јаваш-јаваш јахшылашыр. Дүзәлмәсә дә, һәкимләр чалышыр ки, гајдасында сахласынлар, бундан сонра писләшмәсин”.
Јусиф Әһмәдов дејир ки, идманчы олмағын дөјүшдәки әсас үстүнлүјү өзүнү даһа дөзүмлү, сәбирли апара билмәклә бағлыдыр. Онун сөзләринә ҝөрә, пешәкар идманла мәшғул олмасы, хүсусән физики бахымдан чох көмәјинә чатыб.
“Мән кәшфијјатда, “һәмлә” таборунда идим. Бу таборда бирбаша дөјүшдәсән, физики-тактики һәрәкәтләрдә чох диггәтли олмалысан, дөјүшү өзүн гурмалысан. Неҹә ки, рингләрдә, татамиләрдә өз дөјүшүмүзү гурмушуг, орада да чалышдыг ки, дөјүшүмүзү гураг. Мән татамидә ермәни идманчы илә дөјүшмүшәм вә 4 дәфә ону “накаут” еләмишәм. Бир дәфә Русијада бир рус идманчы мәнә демишди ки, “сиз балаҹа өлкә олсаныз да, чох ҹүрәтли, ҹәсарәтлисиниз. Амма о ҹәсарәтинизи ермәниләрин үзәриндә ҝөстәрә билмәмисиз”. Бу, бөјүк дамға иди вә мәнә чох пис тәсир етмишди. Мән дә дөјүшләрә гатылдым, шүкүрләр олсун ки, үзәримиздән һәмин о дамғаны ҝөтүрдүк”.
Гази дејир ки, елә јарышларда олдуғу кими дөјүшдә дә ермәниләрин зәифлијинин шаһиди олуб. Онлар бизим дөјүшчүләрин әзми гаршысында таб ҝәтирмәјәрәк силаһларыны атыб гачыблар.
Ј. Әһмәдова чемпион кими даим бајрағымызы јүксәкдә ҝөрмәк таныш һисдир. Газимиз дејир ки, торпаглар ишғалдан азад олундугҹа ора өз бајрағыны санҹмаг исә инсанда тамам башга дујғулар јарадыр:
“Јарышда һимн чалынанда инсанын өзүндән асылы олмајараг ҝөзүндән јаш ҝәлир. Маҹарыстанда, Алманијада, Франсада вә диҝәр өлкәләрдә галиб ҝәләркән ағладығым видеолар вар. Бу өлкәләрдә мәни һеч ким танымыр, о галхан бајрағын, охунан һимнин һансы өлкәјә аид олдуғу илә марагланырлар. Бу да инсаны чох гүрурландырыр. Амма бу мејдан исә гејрәт мејданыдыр. Јарыш мејданында өз өлкәни ҝөстәрирдин, дөјүш мејданында исә өз өлкәнин гејрәтини ҝөстәрирсән. Өлкәмизин гүруру бурада милјон дәфә јүксәкдир. Торпаг бизим гејрәтимиздир, биз ону ҝери гајтармасаг, мән нә гәдәр јарышларда иштирак едиб бајраг галдырсам да, һеч бир әһәмијјәти јохдур”.
Вәтән мүһарибәси газиси дөјүшә шәһид олмаг үчүн ҝетдијини дејир: “Кәрбәладан ҝәтирдијим кәфәними ҝејиниб дөјүшә ҝетмишдим. Мән шәһид олмаг үчүн ҝетмишдим, чүнки торпаг уғрунда өлмәк шәһидликдир. Бундан ҝөзәл бир шеј јохдур. Хош о шәһидләримизин һалына! Бу ҝүн јаралансам да, ағрыларла сызласам да, шәһидләримизә гибтә едирәм.
Шәһидләр хијабанына ҝедирәм, бош гәбир јерләринә бахыб ағлајырам...”
Гази дејир ки, мүһарибәдә дөјүшчү јолдашларында ҝөрдүјү әзм, Вәтән севҝиси она һәмишә бөјүк руһ вериб. Ҝүнләрлә аҹ галсалар да, һеч ким дајанмаг һаггында дүшүнмәјиб. Дөјүшән һәр бир әсҝәр анҹаг ирәли ҝетмәји дүшүнүб вә буҝүнкү гәләбәмизин өзәјиндә мәһз бу дајаныр.
Ҝүлнар Әлијева
Диггәт: Хәбәрдән Истифадә Етдикдә Мәнбәјә Истинад Лазымдыр!