Әһли Бејт -АБНА- хәбәр аҝентлијинин вердији хәбәрә әсасән:
Һаким Елдар Исмајыловун истинад етдији Ҹинајәт Просессуал Мәҹәлләсинин 92.13-ҹү маддәсиндә дејилир: “Шүбһәли вә ја тәгсирләндирилән шәхс мүдафиәчидән имтина етдији андан өзүнү мүстәгил мүдафиә едән һесаб олунур. Мүдафиәчидән имтина етмиш шәхс бу имтина гәбул едилдикдән сонра мәһкәмә истинтагы башлананадәк ҹинајәт просесинин һәр һансы анында бунунла әлагәдар өз мөвгејини дәјишмәјә һаглыдыр”.
Һазыркы вәзијјәтдә исламчылар - Азәрбајҹан Ислам Партијасынын лидери Мөвсүм Сәмәдов, партијанын сәдр мүавини Вагиф Абдуллајев, Астара рајон тәшкилатынын сәдри Руфулла Ахундзадә, Масаллы руһаниси Фәрамиз Аббасов, Мөвсүм Сәмәдовун јахын гоһумлары Фирдовси Мәммәдрзајев вә Дәјанәт Сәмәдов неҹә һәрәкәт етмәлидирләр?
Августун 26-дәк Мөвсүм Сәмәдовун һүгугларыны мүдафиә етмиш вәкил Анар Гасымов “Медиа форум” сајтына ачыгламасында дејиб ки, августун 26-да мәһкәмәнин тәгсирләндирилән шәхсләрдән вәкилләрдән имтина әризәсини гәбул еләмәси ганунсуз вә әсассыздыр: “Чүнки вәкилдән имтина үчүн әсас олмалыдыр. Јәни вәкил өз ишинин өһдәсиндән ҝәлмир, јахшы мүдафиә гура билмир, јахуд вәкилә хидмәт һаггы олараг пулун өдәнилмәси мүмкүн дејил вә саирә. Һүгугларыны мүдафиә еләдијимиз шәхсләрин әризәләринин һеч бириндә белә әсас јохдур. Әксинә, һәмин әризәләрдә билдирилиб ки, вәкилләрдән имтина онларын өз ишинин өһдәсиндән ҝәлмәмәси илә бағлы дејил, бу имтинанын әсасы мәһкәмәнин мүстәгил, әдаләтли вә гәрәзсиз олмамасы илә әлагәдардыр. Тәгсирләндирилән шәхсләр һесаб едирләр ки, мәһкәмә сијаси сифариш әсасында шоу кечирир. Әризәләрдә гејд олунур ки, тәгсирләндирилән шәхс олараг өзүмүзүн вә вәкилләримизин бу шоунун актјорларына чеврилмәсини истәмирик. Мәһкәмәјә етираз әламәти олан бу имтиналары гәбул еләмәклә һаким фактики, долајысы илә һәмин әсаслары гәбул етмиш олду”.
Сентјабрын 2-дә кечирилән мәһкәмә просесиндә баш верәнләрлә бағлы мүәјјән мәлуматларын олдуғуну дејән Анар Гасымов һаким Елдар Исмајыловун гејри-сәмимилик нүмајиш етдирдијини билдириб: “Һаким буҝүнкү просесдә дејиб ки, Ҹинајәт Просессуал Мәҹәлләсинин 92.13-ҹү маддәси барәдә тәгсирләндирилән шәхсләрә мәлумат вериб. Белә бир һадисә баш вермәјиб, һаким тәгсирләндирилән шәхсләрә һеч бир изаһат вермәмишди. Чүнки һүгугларыны мүдафиә етдијимиз шәхсләрин һәр бири өз әризәләриндә јазмышды ки, бизә дөвләт тәрәфиндән тәјин едилмиш вәкил лазым дејил, әҝәр вәкил лазым олаҹагса, биз јенә дә әввәлки вәкилләрә мүраҹиәт едәҹәјик”.
Анар Гасымов ону да вурғулајыб ки, Ҹинајәт Просессуал Мәҹәлләсиндә вәкилин ҹинајәт иши үзрә кечирилән мәһкәмәјә бир даһа дөнмәмәси барәдә маддә јохдур: “Јәни шәхс мүдафиәчидән имтина едә биләр вә јенидән һәмин вәкиллә мүгавилә бағлаја биләр. Ҹинајәт Просессуал Мәҹәлләсинин јалныз бир мүддәасыны рәһбәр тутуб диҝәрләрини унутмаг олмаз. Һакимин истинад етдији маддәдә ҝөстәрилир ки, “мәһкәмә истинтагы башлајанадәк”. Индики вәзијјәтдә исә шәхсләр мәһкәмә истинтагынын ҝедишатында мүдафиәчиләрдән имтина едибләр. Онда суал олунур ки, бу һалда неҹә һәрәкәт едилмәлидир? Јәни шәхс мүдафиәчидән имтина едә билмәз? Јахуд јени вәкиллә мүгавилә имзалаја билмәз? Бу, тамамилә абсурддур. Һесаб едирәм ки, бурада мәһкәмәнин гәрәзли вә мүстәгил олмамасындан ирәли ҝәлән конкрет сијаси мәгсәдләр вар”.
Мәһкәмә просесләринин һәфтәдә үч дәфә кечирилмәсинин дә архасында сијаси мәгсәдләрин дајандығыны дејән мүдафиәчи бу һала дәфәләрлә етираз етдикләрини, лакин һаким Елдар Исмајыловун буна мәһәл гојмадығыны вурғулајыб: “Вәкилләрин диҝәр просесләри дә олур. Мүмкүн дејил ки, вәкил бүтүн просесләрдә ејни анда иштирак еләсин. Белә график мүдафиә тәрәфинин кејфијјәтини ашағы салмаға һесабланыб. Һесаб едирик ки, мәһкәмәнин графики сыхлашдырмасы онун гәрәзлилијинә сүбутдур, тәгсирләндирилән шәхсләрин, еләҹә дә вәкилләрин һүгугларынын позулмасы демәкдир”.
Анар Гасымов индијә гәдәр ишә гошулан бүтүн вәкилләрин һәлә ибтидаи истинтаг дөврүндән шәхсләри мүдафиә етдијини дејиб: “Биз һәлә ишин ичиндә ола-ола иш материаллары илә танышлыға бир ај вахт сәрф етмишдик. Бу ҝүн кечирилән просесдә һаким дејиб ки, јени вәкилләрә ишлә таныш олмаг үчүн он ҝүнәдәк вахт верә биләр. Там мәсулијјәтимлә дејирәм ки, һеч бир вәкил бу мүддәтдә ишлә там таныш ола билмәз вә сәмәрәли мүдафиә гура билмәз”.
Вәкилин сөзләринә ҝөрә, јалныз тәгсирләндирилән шәхсләрин мәнафеләри арасында зиддијјәт оланда бир вәкил тәкҹә бир шәхси мүдафиә едә биләр: “Индики һалда мән һәмин алты шәхсин алтысынын да мүдафиәсинә гошула биләрәм вә Азәрбајҹан ганунвериҹилији буна имкан верир. Һакимин биз вәкилләрин бундан сонра бу ишә чыха билмәјәҹәјимиз барәдә дедији исә сырф сијаси вә гәрәзли мәгсәд дашыјыр. Азәрбајҹан ганунвериҹилијиндә буну сүбут едә биләҹәк һәр һансы мүддәа јохдур”.
Анар Гасымов тәгсирләндирилән шәхсләрин гоһумларынын артыг она вә диҝәр вәкилләрә мүраҹиәт етдикләрини дејиб: “Онлар бизимлә мүгавилә бағламаг истәдикләрини дедиләр. Биз сентјабрын 12-дә өз ордерләримизи һакимә тәгдим едәҹәјик. Бу заман артыг сөз мәһкәмәниндир. Әҝәр һаким бизим ордерләри гәбул етмәсә, бу, артыг шәхсин мүдафиә һүгугларынын позулмасы демәкдир. Бу мәсәлә илә бағлы Авропа Инсан Һүгуглары Мәһкәмәсинә мүраҹиәт олуна биләр вә Авропа Конвенсијасынын 6-ҹы маддәсинин - әдаләтли мәһкәмә арашдырмасы һүгугунун тәләбләринин кобуд сурәтдә позулмасы демәкдир”.
Вәкил һәмчинин исламчыларын иши үзрә мәһкәмә просесинә һакимлик едән сәдарәтин фәалијјәти илә бағлы Мәһкәмә-Һүгуг Шурасына мүраҹиәт етмәк үчүн кифајәт гәдәр әсасын олдуғуну әлавә едиб.
Ҹинајәт Просессуал Мәҹәлләсинин нәзәријјәси үзрә експерт адынын чәкилмәмәси шәрти илә “Медиа форум” сајтына билдириб ки, бу мәҹәлләдә мүдафиәчинин иштиракы илә бағлы бир сыра зиддијјәтли маддәләр вар: “Һәм мәнтигә зиддир, һәм дә реаллыға. Дүздүр, бәзиләринә дүзәлишләр верилиб, амма бәзиләри һәлә дә галмагдадыр. Ганунда бирмәналы шәкилдә јазылмајыб ки, шәхс мүдафиәчидән имтина етсин вә сонра фикрини дәјишиб ону јенидән вәкил олараг тутмасын”.
Тәгсирләндирилән шәхс өз мүдафиәси үчүн мүдафиәчи тәләб едирсә, мәһкәмә - јәни ҹинајәт тәгибини һәјата кечирән шәхсләр үчүн буна әмәл етмәк мәҹбуридир: “Јалныз бир һалдан башга. Әҝәр шәхсин мүдафиәчиси вар идисә, шәхс бундан имтинаны мәһкәмә истинтагы башламаздан әввәл едибсә, онун јени мүдафиәчи илә тәмин олунмасы мәҹбуридир. Әҝәр мәһкәмә истинтагы башлајыбса, артыг мәҹбури характер дашымыр. Бир шәхсин кечмиш вәкилинин диҝәр шәхсин јени вәкили олмасы мәсәләсинә ҝәлинҹә, ганунда бунунла бағлы бирбаша һеч бир мүддәа јохдур. Јалныз Ҹинајәт Просессуал Мәҹәлләсинин “Мүдафиәчијә вә нүмајәндәјә етираз” адлы 114-ҹү маддәсиндә ҝөстәрилир ки, тәгсирләндирилән шәхсләрин мараглары арасында зиддијјәт варса, бир вәкил јалныз бир шәхсин мүдафиәчиси ола биләр. Әҝәр бу дејилән һаллар јохдурса, һаким ејни вәкилә ишә чыхмаға иҹазә вермәлидир. Ола биләр ки, мәһкәмә Ҹинајәт Просессуал Мәҹәлләсинин 92.13-ҹү маддәсинә истинад етсин. 92.3.1-ҹи маддәдә исә дејилир ки, шәхс мүдафиәчи тәләб етдикдә мәһкәмә ону тәмин етмәјә борҹлудур”.
