Әһли Бејт -АБНА- хәбәр аҝентлијинин вердији хәбәрә әсасән: Азәрбајҹан Ислам Партијасынын лидери Мөвсүм Сәмәдовун, партија сәдринин мүавини Вагиф Абдуллајевин, партијанын Астара рајон тәшкилатынын сәдри Руфулла Ахундзадәнин һәбс гәтимкан тәдбиринин даһа 4 ај узадылмасындан апеллјасија шикајәти верилиб. Һәбс гәтимкан тәдбиринин узадылмасы гәрарыны Нәсими Рајон Мәһкәмәси апрелин 15-дә чыхарыб.
Вәкил Анар Гасымовун “Медиа форум” сајтына ачыгламасына ҝөрә, Мөвсүм Сәмәдов истинтагын ләнҝлијиндән шикајәт едир: “Бакы Истинтаг Тәҹридханасына көчүрүләндән бәри Мөвсүм Сәмәдов, еләҹә дә диҝәр һәбс олунанлар тәк бир дәфә истинтага изаһат верибләр. Бундан әлавә ҝөрүшләр олуб, мисал үчүн, һансыса експертизанын рәји илә таныш етмәк мәгсәдилә вә саир. Лакин актив истинтаг һәрәкәтләри апарылмыр”.
Анар Гасымов Республика Прокурорлуғунда јарадылан истинтаг групунун 15-дәк үзвүнүн олдуғуну хатырладыб: “Амма фактики олараг бир нәфәрин - истинтаг групунун рәһбәринин фәалијјәт ҝөстәрмәсинин шаһиди олуруг. Истинтагын ләнҝлијиндән шикајәтләнәндә бизә дејирләр ки, шаһидләр вар, онлары диндирмәлијик, експертизаларын рәјләри алынмалыдыр, ишимиз чохдур”.
Вәкил һесаб едир ки, истинтагын ләнҝ һәрәкәт еләмәси просеси узатмаг мәгсәди дашыјыр.
Мөвсүм Сәмәдов, Вагиф Абдуллајев, Руфулла Ахундзадә вә АИП лидеринин гајыны Фирдовси Мәммәдрзајев Ҹинајәт Мәҹәлләсинин 28, 214.2.1-ҹи (габагҹадан әлбир олан бир груп шәхс, мүтәшәккил дәстә вә ја ҹинајәткар бирлик (ҹинајәткар тәшкилат) тәрәфиндән ҹинајәтә һазырлыг), 28, 214.2.3-ҹү (одлу силаһдан вә силаһ гисминдә истифадә олунан предметләрдән истифадә етмәклә ҹинајәтә һазырлыг), 228.3-ҹү (ганунсуз олараг одлу силаһ, онун комплект һиссәләрини, дөјүш сурсаты (јивсиз одлу ов силаһы вә һәмин силаһ үчүн дөјүш сурсаты истисна олмагла), партлајыҹы маддәләр вә гурғулар әлдә етмә, башгасына вермә, сатма, сахлама, дашыма вә ја ҝәздирмә), 278-ҹи (һакимијјәти зорла әлә кечирмә вә ја ону зорла сахлама) маддәләри илә иттиһам олунурлар.
Фирдовси Мәммәдрзајевә Ҹинајәт Мәҹәлләсинин 278-ҹи (һакимијјәти зорла әлә кечирмә вә ја ону зорла сахлама) маддәси илә иттиһам ирәли сүрүлмәјиб.
Диггәт: Хәбәрдән истифадә етдикдә мәнбәјә истинад лазымдыр
