Әһли Бејт (әлејһимус сәлам) Бејнәлхалг Хәбәр Аҝентлији –АБНА: Американын Newsweek журналы бир мәгаләсиндә Иран вә Русијанын Каспи дәнизиндә кечирдији бирҝә һәрби-дәниз тәлимләринә тохунараг, бу тәлимин Теһран-Москва әмәкдашлығынын ҝүҹләндијини ҝөстәрмәк вә АБШ-јә месаж вермәк мәгсәди дашыдығыны гејд едиб.
ИРНА-нын бу Америка нәшринә истинадән вердији базар ертәси ҝүнкү мәлумата ҝөрә, Иран вә Русија АБШ-јә гаршы бир чағырыш олараг Каспи дәнизиндә бирҝә дәниз тәлимләринә башлајыблар. Бу тәлимләр бу ҝүндән башлајараг үч ҝүн давам едәҹәк.
Newsweekin аналитики бу тәлими, Исраилин Иранын нүвә објектләринә һүҹумундан бир нечә һәфтә сонра Иран вә Русија силаһлы гүвәләринин әмәкдашлығыны АБШ-јә месаж кими шәрһ едиб.
Јазы мүәллифинин фикринҹә, Теһран Исраиллә 12 ҝүнлүк гаршыдурмадан сонра һәрби имканларыны ҝүҹләндирмәк вә Русија илә Чин тәрәфиндән дәстәк алмаға чалышыр.
Журналын аналитики, һәмчинин, кечән һәфтә Иранын хариҹи ишләр назири Абас Әрагчинин Шанхај Әмәкдашлыг Тәшкилатынын тәһлүкәсизлик форумунда иштирак етмәк үчүн етдији сәфәрә дә истинад едиб. Әрагчи бурада Русија вә Чин рәсмиләри илә ҝөрүшләриндә Вашингтонун һәрби һәрәкәтләринә гаршы бирҝә мөвге вә даһа чох стратежи әмәкдашлыг тәләб едиб.
Newsweek сонда гејд едир ки, Иран вә Русија бу илин әввәлиндә бирҝә тәлимләри, технолоҝија мүбадиләсини вә ортаг тәһдидләрә гаршы координасијаны әһатә едән бир мүдафиә сазиши чәрчивәсиндә мүнасибәтләрини даһа да ҝүҹләндирибләр.
Sizin rəyiniz